الحمد لله..الخنشورة..من ضهر أوراق الذاكرة2..أفلام كرتون..اللي حصل ف إمتحان الشفوي

الحمد لله

ربنا كرمني آخر كرم...تكونوش دعيتول؟؟

حبقى أعرفكوا على المادتين اللي عدوا ف يوم م الأيام

.................................

الخنشورة

من وقت للتاني كنت بريح بين الذاكرة فاقعد أقلب ف التلفزيون -وصلة عقبال آمالتك- فجذب إنتباهي صوت صباح ف قناة من قنوات الأغاني

من المفارقات الغريبة
الشحرورة صباح "أو على رأي واحد صاحبي "الخنشورة صباح"
بعد أن بلغت من العمر أرزله تطل علينا بقوامها الممصووص و عظامها البارزة لتغني أغنية "أموت أنا"
مما جعلني أتساءل :طب مستنية إيه كل ده؟؟؟و مين ده اللي مالوش قيمةعشان تضحي بزهرة شبابها"زهرة خشخاش" عشانه؟؟؟

و اللي فعلا ضحكني إن فيه مغنية جديدة طالعة ف حتة من الأغنية و قالت جملة منها فيبان إن لسة الشحرورة فيها الرمق رغم إنها المفروض تعمل عملية شد حبال الصوت مع عمليات شد الوش صوتها مازال يضرب تلات أرباع المغنيات الجداد بالجزمة

......................

من ضهر أوراق الذاكرة 2

الحاكم بأمر الله
الحاكم بأمره
الحاكم بأمرهم
هو ده التطور الطبيعي لحكم مصر على مر العصور

.....................

أفلام كرتون

أفلام الكرتون الجديدة جميلة جدا

ف وسط زنقة الإمتحان اللي فات ...اللي كان قبله 3 أيام بس و مكون من 36 محاضرة متوسط المحاضرة بعد تلخيصها 7 صفحات يعني مطحنة.....فوجئت بفيلم و أنا بارتاح على ديزني شانل--قناة الكرتون -هايل فضضلت متنحله ييجي ساعة و سجلت بقيته

الفيلم إسمه

The INCREDIBLES

الفيلم ده دماغ ...مش ححرقلكوا القصة لكن حقول إنه الثري دي بتاعه هايل و الفكرة بتاعته جامدة طحن

.......................

اللي حصل ف إمتحان الشفوي

إمبارح كان عندي الشفوي بعد النظري على طول

و كان المفروض لجنة الشفوي تبدأ الساعة 2بعد الضهر

علما بإني صاحي يوميها الساعة واحدة صباحا عشان ألحق ألم نفسي قبل إمتحان النظر اللي كان الساعة 9 صباحا

خلصت النظري الساعة حداشر

سيادة جناب الدكتور جه الساعة أربعة إلا ربع

و سيادته عشان لاقاله سبوبة برة الكلية-حيروح لجنة شفوي ف كلية تانية النهاردة و كله بحسابه-ضم اللي عنده ف أول يوم على تاني يوم

يعني مية خمسة و تلاتين طالب ف ليلة

و أنا بما إني ف أواخر لجنته دخلت ف الآخر

إحسبوها إنتم ...لو كل طالب أخد من وقت سعادته ف إمتحان الشفوي خمس دقايق يعني كان المفروض يخلص بعد حداشر ساعة و نص

و هو بادئ 4 يبقى المفروض يخلص الساعة 3 و ربع صباحا

لكن العفريت خلص حوالي الساعة تسعة و شوية...يعني الطالب ماخدش ف إيده دقيقتين و المفروض إنه سأله ف ستة وتلاتين ساعة محاضرات...ياخي ؟؟؟

المهم دخلت و سألني أول واحد

تعرف إيه عن الفوسفو ليبيد

ف بدأت أتكلم و هو قاعد يهز دماغه و يبص ف الكميوتر

حبة و إدا لواحد رنة من التلفون..كل ده و قاعد يهز دماغه..إبن اللزينة عامل مركز معايا..

بلاش أنا

واحد دخله فسأله قاله قولى مرض من الفتيرناري...مرض حيوانات يعني...الطالب إتلخبط و قاله سيستيك فيبروزيز ..و ده أساسا ف الإنسان...عداها و ما خدش باله

و كله من أجل السبوبة

و سلملي على حقوق الطلبة

و بالمرة على أخلاق الدكاترة

و حقوق الإنسان

......................

..................

و أخيرا و ليس آخرا

لسة عندي 3 إمتحانات و إتنين منهم متاخن

دعواتكوا معانا

ملحوظة:الرسمة اللي فوق دي رسمتها من سنتين

من ضهر أوراق المذاكرة

السكينة التلمة اللي على رقبتي لسة لغاية دلوقتي ما حددتش موقفها

تقطع الوريد اليمين ؟؟؟؟

ولا الوريد الشمال؟؟؟؟؟

تقعد تفكر و تفضل رايحة ..جاية

رايحة ...جاية

رايحة ....جاية

بس أفتكر

إني مع أول لحظة تردد...مع تعديتها أول مرة على زمارة رقبتي

ما بقتش تفرق معايا ......و لو فرقت؟؟

برضه مش حعرف أصرخ و أقولها خلاص إستكفيت..

ومش حعرف أطلبلها مسن عشان تحمى

.......

و أخلص

عنوان صعب يتنطق:..وش مش مكرمش

العمر

ما عرفش يعلم على وشي بحدة طبعه

شعري

ما رفعش الراية البيضا وسلم للشيب

ولا انهزم للصلع و طلب حق اللجوء السياسي لكتافي و البلاعات

عيوني

لساها قادرة تحضن ضيك و تمثل إنها مش شايفة خيالك

وداني

لساها بتسمع دوشة الفانات ف الكمبيوتر و زنة اللمبة النيون

كفوفي

لسة بتعرف تمسك كوباية الشاي مسكة صعيدي و بتعرف تمسك فنجان القهوة بصباعين

عضامي

لسة بتتحمل نرفزتي و عنادي ف الحيطان

لكن

و برغم كل ده

جوايا واحد يشبهك

راجل عجوز

سؤال ؟؟؟؟

سؤال

يمكن يكون ساذج جدا ....أو مالوش إجابة

لكن برضه حقوله

................................................

إيه اللي يقدر
يقلب خيوط العنكبوت ف القلب

تكعيبة عنب؟؟.............

.............................................

....................................

ملحوظة

...الصورة اللي فوق من تصويري

بالمأسوف على شبابها الكاميرا الديجيتال

إسمه شندويلي

ياااااااااااااااااااااااه

كل دي ناس فاكرة مازنجر

معلش يا جماعة ماردتش في الكومنت عشان يفضلوا بالأستك

طب إيه رأيكوا قبل ما أتكلم ف البوست نفسه أعمل حاجة ما
أظنش حد عملها قبل كده

حرد على الكومنتات جوا البوست

ويعني إنتوا أقل منها؟؟

ده يتعملكم بلوج مخصوص

الجملة الأخيرة

...وسعت مني شوية

.............................

إبن مصر:
لأ مش فاكر ياسمينة و سندباد....شكلهم من الجيل اللي
قبلي

..................................

بنت مصرية:

و الله يا بنت أنا مطحون و ده اللي خلاني ءأجل الرد على
الكومنتات إسبوع كامل

ده حتى كان عندي إمتحان النهاردة-الجمعة- الصبح

...............................

كتابة :

حرد عليك تحت

.....................................

تاتي:

حالة مميزة إن واحدة تكون بتحب أبو ريالة قوووووووووي

و السر في تلك الحالة يكمن ف الريالة

..................................

Chatter box:

المدونين اللي يعرفوا سني بالظبط حوالي 7 يعني ياما أوي

فمش لازم يزيدوا واحدة

و يا ستي أنا كنت صغير وقت مازنجر

ده حيديكي مسافة عمرية تخمني فيها

........................................

بيبو:

أول ما قريت الكومنت بتاعك كان فعلا قدامي كيس شبسي

و كان التلفزيون والع

بس مش على سبيس تون

كان والع على ديزني شانل

...................................

جيفارا:

أول ما قلتلي يا أبو الغضب إفتكرت الإسم على طول

قبل ما أي حد يبعت كومنت بالإسم

...............................

مويا:

الصراحة ما كنتش باحب ماهر و حوضح ليه تحت

.................................

eman –m:

حرد عليكي تحت

.....................................

ماريو
البورسعيدي:

طبعا فاكر كانت بتنادي عليه إزاي

الصراحة...مش فاكر

كل اللي فاكره إن كان فيه حاجة بتنور و تطفي

فييجي مازنجر

و حكاية أبو الغضب حرد عليها تحت

................................

حمرا:

تعليق غريب مالوش تعليق

.....................................

بفضفض:

عندك حق

أنا غلطان

......................................

Romantic rose:

لأ ..في نسخة أطفال معدلة

ما بيأثرش فيهم فيلم كرتون...لأ ..بيأثر فيهم قنوات
كاملة للأطفال

و معلش يا باشا على الغلطة اللي غلطتها ف الكومنات اللي فاتت

و حرد عليك بعد كده بصيغة المؤنث

:0p

.........................................

طعمة:

ياااه ..إيه كل المشاعر المكبوتة دي

تعيشي و تفتكري

...........................................

أحمد شقير أو
شكير ما أعرفش:

زينة و نحول مين

و ده كان أبيض و إسود؟

................................

طعمة تاني:

أربع سنين و فكراها

يا ذاكرتك الحديدية

.........................................

أ.نشأت:

بس لو كنت طلعت عالم كنت حتعرف تتكلم بالطريقة الغريبة
اللي كان بيتكلم بيها

...............................................

إسلام يوسف:

لأ..لإني ما كنتش متابعه لإنه كان بييجي ف معاد وحش

لكن أوعدك إن سلسلة الكرتون مستمرة

......................................

ghada:

إنتي منظرك بقى بايخ؟؟

أومال أنا منظري إيه

.......................................

هيثم:

يا فرحتي بيك

أنا كنت متابع الفواكه و دولفين لإن وقت ما كانوا
بيتعرضوا كنت مسائي فكنت متابعهم أوي

........................................

أحمد السعيد:

لأ باة كان بيطير...و بص للصور اللي فوق

و موضوع أبو الغضب حرد عليه تحت

.............................................

خجل:

تقوليلي إيه اللي يخنقك من البنات على النت

أقولك إنهم لما ييجي يتكلموا يقولوا "مش كنت"و "مش أعرف"
كإنها خوجاية

أقولك

تشتري كلب

و باين جدا عدم وجود عقد ...من الرسمة اللي بتعبر عنك

معلومة مفيدة

الطب النفسي إتقدم أوي...و علاجك عندي

10 ساعات يوميا تغيري بين سباس تون و ديزني شانل

...................................................

Lasto adri

و أنا نفسي أتفرج على حلقات غرندايزر كلها

................................................................

.......................................................

.......................................

نبدأ بقى نتكلم

دلوقتي بعدما فكرتوني بأبو الغضب و المزدوج و ماهر

طب ليه ما كنتش فاكرهم بأسماءهم؟؟؟؟

بالنسبة لماهر

أنا فعلا ما كنتش باحبه لإنه كان بياخد نص وقت الحلقة و
أنا كنت عاوز أتفرج على مازنجر مش عليه

و أما بالنسبة لأبو وشين....اللي كلكوا عارفينه بإسم المزدوج

و الشرير الكبير ....اللي إنتوا عارفينه بإسم أبو الغضب

فليا تفسير لتمسكي بتعريفي الخاص للإسمين دول

أولا:

و إنا صغير ما كنتش بنطق إسم الشرير إلا لو كان كوميدي

مثال: دنجل..من أفلام ميكي ماوس

قبطان بومبة...من الدولفين

عصابة القناع....ميكي جيب

شنخر و ضخر و رشدان و

كرعون..... من سلاحف النينجا

ثانيا

دايما و إحنا صغيرين بنخرج الحاجات من مسمياتها و
بنسميها بأسماك بنحس بيها و نلمسها

و أنا صغير كنت بأسمي الزقاق

زواق

و باسمي التلفزيون

تفزيون

و كان أخويا و هو صغير أوي

بيسمي الحصان

أجَّه

بلاش كل ده

إبن بنت خالتي

ما كملش تلت سنين

بنت خالتي جابته و جت تزورنا

و أنا كالمعتاد كان عندي إمتحان و قاعد برة بذاكر

كان التلفزيون والع على فيلم تيتو

راسه و ألف جزمة قديمة إن أحمد السقا ف الفيلم إسمه

شندويلي

أمه تقله يا حبيبي ده إسمه تيتو

يقولها لأ شندويلي

تقوله تيتو

يقولها شندويلي

قالتله تيتو

قالها إنت ما بتفهميش حاجة

ده إسمه شندويلي

طبعا مت على نفسي م الضحك و ما عرفتش أركز ف كلمة

كل ما كنت آجي أذاكر ألاقيني أسأل نفسي..جاب شندويلي ده منين؟؟

يبقى من حقي أسمي أبو وشين ..ذو الوجهين ولا لأ

و بالعند فيكم

لو حد سألني عن إسم الشرير الكبير

حقوله

شندويلي