وش مكرمش
وش مكرمش
ألف كتاب على وش مكرمش
يحكي تاريخ العالم كله
المتكَبَر والمتجَبَر واللي مكبَّر
واللي مطنش
احكيلنا يا خطوط الجبهة
عن أيام لصمود و دفاع
عن أيام الحنضل فاكهة
عنها الحسرة والأوجاع
وحنسمع لخطوط الخد
بتقول عن فرحة و كآبة
بتقول عن ضحكي و الجد
تفضح ف الناس الكدابة
تحكي ومش حتبقي لحد
ألف كتاب على وش مكرمش
يحكي تاريخ العالم كله
للي مكبَّر و اللي مطنش
كُلُه سكوت
امنع صوت
قول و اشجينا وبكي عنينا
دي الأدوار للناس بتهمش
صوت الوش ف آخر خط
خط الحرب
يحكي حكاية جدول ضرب
تضرب حبة .. واضرب حبة
سوا حنقسم
مين ف الناس يقدر يتكلم
طب والخلق الهايجة كتيرة
عملوا مسيرة ؟!!!!!!!!!
طب إسمَعها قصة قصيرة
جوه القصة
درس ومنُه راح تتعلم
"راعي اتاكل
مأمأ غنمُه
مين حيخاف؟!!!
مين حيخاف من كبش جبان و قرونُه اتاكلوا
يرجف لما الدنيا تضلم"
واللي بدأها
كلبُه بيسأل
طب و الأسود؟!!
لأ دا بتاعي
مين يتكلم
جوَا ف عينه ححُط صباعي
واهي دي حكاية
مالها نهاية
ليها بداية وكلُه عارفها
كله سكوت
امنع صوت
طب إحكيلنا يا عم الوش
عنه جنيهنا وليه حيروح
زي ما راح من قبله القرش
هم يضَّحَك
هم يبَّكي
فوق الوش
يابني دا إحنا
من أكبرنا لحد أصغرنا
جوا الكرش
إبلع .. أُهبُر
إهرَب بَرا
ألفاظ عامت فوق الوش
حتى ف جسم الناس ومرضهم
غش .. ف غش
من دلوقتي شوف ندابة
تييجي بسرعة علينا تصَوَت
أصل بلادنا حتبقى خرابة
واللي خربها حييجي يعيط
كله سكوت
امنع صوت
طب وسياسة عيش حتموت
يا بني ومالك
رَبي عيالك
سيبك من حالي
أو حالك
فكر ف اللي ف يوم يجرالك
أصل السايس
بالكرباج بيربي الخيل
حتة سُكر يمكن تبسط
بس نهار و ف آخرُه الليل
بس كفاية
رايح مركز للتجميل
رايح اشد خطوط الوش
يمكن أنسى كل حكاية
وانتَ كمان راح تيجي معايا
خط ف وشك لسه رفيع
إلحق شيلُه
قبل ما جوا ف قلبك يوجع
قبل ما تبقى وش مكرمش
شايل هم العالم كله
وكله .....مطنش .
تم كتابتها في
10-4-2003
posted by sydalany-وش مكرمش @ ٧/٢٢/٢٠٠٥ ١٢:١٦:٠٠ م
12 Comments:
جميل جميل.
إزاي لم أجد هذه المدوّنة من قبل؟
هل أنت على الحلقة المصريّة؟
عبقري وفاهم انت بتعمل ايه.......المزيد المزيد ارجوك
r:
النسبة للحلقة المصرية أنا دونت نفسي بس لسة ما وصلنيش التأكيد ع الإيميل
وشكرا على الإطراء
eskandarany:
أخجلتم إسمو إيه ده ..تواضعنا
و حكاية فاهم أنا باعمل إيه يا ريت تعرفني حسيتها إزاي عشان أبقى أعملها كتير
اية الكلام الكبير دة ؟
قسم وسمعنى
إدينا كمان ومتبخلش علينا
فكرتنى ببيرم التونسى شاعر الشعب
بس لية بتغير القافية والبحر كتير ؟
غاوى تتعبنا يعنى ؟
يا عم لا غاوي أتعبكوا ولا حاجة
وللعلم وش مكرمش بالزات من أول كلمة لآخر كلمة ماشي فيها على تفعيلة واحدة يعني الوزن ما اتغيرش و لا اتكسر و أنا متأكد من ده
أما تغيير القافية فكان ممكن ما أحطش قافية أساسا لأن شعر التفعيله مش ضروري يلتزم بقافية واحدة أو بقافية أساسا
حلوة جداً - القصيدة والمدونة عموماً
بس هو يعني إيه درمغة؟
سعيد بزيارتك يا سقرط
درمغة:
ليست لها أصل لغوي لكن تستخدم بصورة دارجة نسبيا و
لها أكثر من معنى
1- بهدلة
في أحد المقالات الرياضية السعودية قال الناقد الرياضي أن فريق س درمغ فريق ص
س و ص عشان مش فاكر قال مين مع مين
2- معنى يفهم من
حقلبها درمغة
و أكيد سمعت التعبير ده و لو حتى ف فيلم جاءنا البيان التالي
3-معنى بين بعض شباب الطبقات العليا
حين يشربوا الخمر يطلقون على الحالة التي يصل إليها من يشرب خمر مركز أو مخدرات
تعريفي الخاص لها
بهدلة
صيدلانى انت تحفة
انت بجد وش مكرمش
ما تعرفيش قد إيه سعيد بكلامك لدرجة ...لدرجة ....مش عارف
حقوم أعمل شاي
أعملك معايا؟
this is very beautiful , I really like it :)
الله عليك
أهو ده بقا الوجع اللي بيترسم كلام بس بحرفنه
نفسي أرد عليك بس الواحد يا عم يخاف من الجيره دي عشان السُكنى دي اصلها مقامات وانت ما شاء الله في العلالي
free soul:
thx
بنت عادية:
الله يكرمك
بس إيه يخاف م الجيرة دي
للعلم:دي رابع عامية أكتبها ف حياتي
إرسال تعليق
<< Home