الاثنين، يوليو 25، 2005

إعلانات

موضوع في مدونة منت سخني إني إكتب
هي شرحت إعلانات بالتفصيل و الإعلانات اللي إتكلمت عنها أنا إفتكرتها علطول و أكيد فيه من اللي عدا عليهم الإعلان ولو مرة واحدة إفتكروه

الإستنتاج:
نوعية الإعلانات المضحكة أو اللي فيها ناحية قذرة بيثبت ف الذهن أكتر من أي إعلانات تانية

و حذكر أمثلة و مش حقول الإعلان كله
1-
"إيييزي موووووووزو"
2-
"رووحلها..رووحلها"
3-
"بيبو فرقع جيجي"
4-
"طلب رز ..عملت رز..طلب مكرونة ..برضه عملت مكرونة..بصلي من فوق لتحت وساب البيت
سمنك ف الأكل كتير..لأ
ولا قليل؟؟؟"
5-
"حندوس ف المنجة..آه يا منجة"
6-
"إديني شفطة...وحياة باباكي"
7-
"أنا معجب بيك أوي يا دكتور...أكيد مش أكتر مني يا دكتور.....هه حصل ..أكيد حصل"

بلاش دول خلينا ف إعلانات المواقف
إعلانات برفانات هوجو الحريمي
"do u always wait for him to make first move?"

إعلانات
axe
وحدث ولا حرج ....كلها

إعلانات الفيجرا
قمة ف القذارة
في المقابل إعلانات السيالس -و له نفس الإستخدام ما فيهوش- أي شئ يخدش الحياء

إعلانات الفوط الصحية
كلها بتخلي وشي يحمر
و كلها لازم الموديل تجري و تتنطط و توطي تلم عيال صغيرة أو كتب م الأرض
و ما بتوطيش زي أي بنت أهلها مربينها لأ لازم بطريقة تبين الفعالية

واحد شبه البرص الجعان
ياكل من المنتج يبقى روش طحن و البنات تتلم حوليه

أعلان مورو
كل شوية موتوسيكل أو عربية تقف و ينزل منها شباب مختلفي الأحجام من حجم البني آدم لحجم عجل صغير بيلعب حديد يعرضوا نفسهم على واحدة
و ف الآخر بتاع مورو هوه اللي يكسب


لكن ده ما يمنعش إن فيه إعلانات نضيفة و معلقة مع الواحد جدا و كتير عارفينها

مثال:
كنت ف رحلة فبدأنا نهيس كالعادة في رحلة الرجوع واحد بدأ أغنية إعلان و
كلنا غنينا معاه

"إديني لبانة من السحري ..إشمعنى السحري مصر عليه..جرب وحتعرف وحدك ليه ..السحري لبان أمضغوا ألقيه ألوان ألوان يا نهار أخبر..السحري البني و الأصفر تمضغ يديلك لون أحمر..لو عاوز أزرق أعمل إيه ..أُمضع ف الأول لون أحمر..دووق دووق دوق أحلى هدية السحري لبان طعموا يا جدعان ية المية ...أمضغوا و أنا أزود ف المصروف ..أبدا أبدا دا ما أهوش غالي و أشتري حتشوف
دووق دووق دووق أحلى هدية السحري لبان طعموا يا جدعان مية المية... دوق دوق
من هاني ويل

و فيه إعلان روعة
بتاع كادبوري
عندما تعشق الشيكولاتة
فعلا عبر عن إحساسي لما باكولها
الكرسي بيكبر بمعنى الراحة و الواحد يتحرك ف أثير من الحليب و الشيكولاتة


و فيه إعلان قديم أوي يدوب أوعى عليه
هاتلنا ريري هتانا ريري هتانا نه باكو و إتنين
إجري بسرعة يا واد يا حسين تقب و تغطس و تشوف فين شوفلينا ريري بيتباع فين..أنا جيت أهني بشكل جديد و معايا فيتامين كله حديد من رضعة واحدة إبنك حيزيد غير مشيه بدري ده بالتأكيد....
ريري جه هل هلاله الكل هيصله و قالوا ...جانا ريري جانا هيصوا و قولوا معانا..يا مشبعنا يا مغزينا يا مكبرنا و مقوينا ..هتلنا ريري هتلنا ريري هتلنا منه باكو و اتنين...البركة ف ريري"
والإعلان ده هو و بتاع اللبان كان لهم خلفية رسوم متحركة مش مودلس
وريري بعد ما الولد ياكل نلاقيه كسر الباب و طلع شايل أبوه ونسمع كلمة البركة ف ريري ...كان بيضحكني أوي الإعلان ده
على العموم اللي فاكر حاجة تانية يقولها
وحسيب فلسفةالموضوع لكم مش حفلسفه دلوقتي

29 Comments:

Blogger Bent Masreya said...

انت ليه ماتكلمتش عن إعلانات الرعب

كنت وانا صغيرة.ز صغيرة اوى لدرجة ان اى حاجة هبلة ترعبنى

كان فى اعلان بنت بتدور على مصاصة تقريبا وماشية تغنى بحلم بيك انا بحلم بيك

واول ما تلاقى المصاصة تصوت .. بحلم بييييييك

انا يجيلى صرع بعدها على طول، ولما كنت الاقى الإعلان فى بدايته اجرى اقفل التلفزيون او اغير القناة لحد ما يخلص

الاثنين, 25 يوليو, 2005  
Blogger sydalany-وش مكرمش said...

و بمناسبة الزعيق
كان فيه إعلان عن
رسوم متحركة برضه

" عاوز لبان أنا عاوزه الآن سامباو مزيكااا و بوسيكااااااااااا"
طبعا ما كنتش فاهم بيقول إيه

الاثنين, 25 يوليو, 2005  
Blogger وليد said...

ليه متكملتش عن اعلانات جيل المستقبل
فاكرها

الا كانت بتطلع شباب مصر كلهم بالبدل والكمبوتر المحمول
واخر جمال
اه
اخر جمال مبارك

الثلاثاء, 26 يوليو, 2005  
Blogger sydalany-وش مكرمش said...

طبعا ما أتكلمش عنه
أنا إتكلمت عن إعلانات ليها قيمة

بلاش
أقولك أنهي أحسن و علق معاك إعلانات اللبان و لا شباب المستقبل

و أنهي أنضف إعلانات الفوط الصحية ولا إعلانات شباب المستقبل؟

و أنهي أحسن لمستقبل الشباب
شباب المستقبل ولا الفيجرا؟؟؟؟؟؟؟

الثلاثاء, 26 يوليو, 2005  
Blogger الست نعامة said...

بمناسبة الاعلانات الابيحة، فيه اعلان عن الصابون واعلان بنك مصر الشهير لو تتذكرونه.

الثلاثاء, 26 يوليو, 2005  
Blogger Guevara said...

على فكرة انت هاجمت معظم الإعلانات اللي انا بحبها.. مش عارف دي صدفة ولا مقصودة..أتمنى ماجيش يوم و تهاجم نانسي عجرم .. ساعتها حيبقى حسابك معايا عسير

الأربعاء, 27 يوليو, 2005  
Blogger sydalany-وش مكرمش said...

الست نعامة:
لا والله يا ست نعامة مش فاكره


جيفارا:
عشان خاطرك لو هاتجمت نانسي مش حهاجم حاجة عجباك

بس تبقى تحددلي أنهي حتت عجباك بالظبط عشان ما أكتبش فيها
:-pp~~~~~~~~

الأربعاء, 27 يوليو, 2005  
Blogger S H E B A K said...

كان في اعلان بيعجنى اوى زمان و اكتشفك انه لسة بيجى فى التلفزيون فى الصيف
:بتاع
ناموس عمال يقرص ياخويا
مش عارف انام منه ياخويا
مش عارف أنااام
:-P

الأربعاء, 27 يوليو, 2005  
Blogger sydalany-وش مكرمش said...

أحلى حاجة إن أخوه طول الإعلان مصدر الإخة و قاعد يقرا ف الجرنال ولا حاسس بنموس ولا حاجة
:0)!

الأربعاء, 27 يوليو, 2005  
Blogger ساحر الصحراء said...

الله يقلب عليك المواجع فكرتنى باعلان هارتى بتاع مامتى وطنطى وخالتى حريفه لبان كان ستات العيله كلهم يشوفوه ويمشورونى لبتاع اللبان بس بجد اوعى تيجى جنب نانسى دى هيه الحاجه الوحيده اللى الواحد ممكن يحلم بيها

الأربعاء, 27 يوليو, 2005  
Blogger Mr-Biboooo said...

تخلص من حمامك القديم
ثم بوووووم و حمام جديد مريح جميل ياسلام بيت الراحة فعلا
ثم تيش

بوست متألق يا صيدلانى

الخميس, 28 يوليو, 2005  
Blogger Nefsy said...

وفى اعلان كان بيجى زمان كان بيشيلنى الهم بتاعع لسه حتنزلى وتنقى وتقشرى وبعدين تطبخى وتااااااااااانى حتنزلى وتقشرى و و و ....... عشان فى الاخر يطلع منتج لاكل اطفال جالهم اكتئاب من الاعلان ده

السبت, 30 يوليو, 2005  
Blogger Ghada said...

موضوع ظريف
أنا بحب إعلانات هيوجو، حريمي ورجالي..... بحس انها شيك، إعلانات البرفانات دايماً حلوة
أما إعلانات آكس هو يمكن يكون عندك حق، بس متنكرش انها مبتكره

إعلانات الفياجرا؟ أنا شفت إعلان واحد، كان تلميح وقح صحيح، بس مبتكر، كان يعتبر إعلان نضيف، مفيهوش غير ورقة نقدية و.... عارفينه؟

أنا بحب أوي إعلانات كلوز آب،خصوصاً بتاع نعناعه ولمون.....اللي أبوها بيقول لها فيه" أنا هعصره!!!"
وإعلانات موبينيل، حلوة أوي

كان فيه برنامج بيجي ف قناة المستقبل، بيعرض الإعلانات الحلوة وبس. كان ظريف أوي..... الإعلانات الأجنبية فيها أفكار.... بس خساره معدش بييجي

جيفارا&ساحر الصحراء: بقى خايفين أوي كده على نانسي؟؟؟ يبقى ممكن أنشر المقال اللي أنا كنت كاتباه عليها قريب بقى..... رغم اني نشرته قبل كده ف مكان تاني...

الاثنين, 01 أغسطس, 2005  
Blogger BaVaLoVa said...

أنا بقى بحب أوي إعلان نايتي اللي كان بيجي زمان و كان الأطفال اللي فيه كلهم مستحميين و متوضبين و متشييكين و يقعدوا يغنوا"نايتي حبيبي , نايتي حياتي, أكله أنا في كل أوقاتي نايتي نايتي"
و كان في إعلان عن تلفزيونات سامسونج
مش فاكرة من غير حتة صغيرة "سامسونج ده صوته حنون لا تقول جيتار و لا قانون " حاجة شبه كدة
و طبعاً إعلان اللبان اللي قلت عليه ده كان جامد جداً

الثلاثاء, 02 أغسطس, 2005  
Blogger mindonna said...

هو انا بكره الاعلانات المصرية عموما ,لأني دايما بحس انه بيستغبي البشر اللي بيتفرجوا عليه , يعني يكرهوني في كل انواع العصاير ,حاكم كل مااروح اشتري واحدة افتكر الاعلان الغبي بتاعها , بس اللي بيعجبني في الاعلانات الاجنبية ان فيها ذكاء شوية ,و بيعرف ازاي يجذب الذبون , يعني حتي لما ييجوا يعلنوا عن الفياجرا ,عرفوا يجيبوها بطريقة (شيك علي قد ما يقدروا ) احسن ما كان يجيبوا رجل و ست يغنوا يا ليل يا عين , مش كده أحسن برده ؟!!ولاايه

الخميس, 04 أغسطس, 2005  
Blogger أنا said...

هايلة فكرة الاعلانات ديه..لانها مع الوقت بتبقه جزء فعلا من ثقافتنا والواحد بيبدء يستعمل مفردتها
الاغرب ان فيه اعلانات الذوق العام متفق عليها سواء من التفهاة او الغلاسة الو خفة الدم او الفكرة المبتكرة وجمال التشكيل
افهم بقه سيدتك عندك ازمة مع ايزي موزو؟

السبت, 06 أغسطس, 2005  
Blogger AZ said...

وكمان كان فى اعلان بونبون سيما
اما جى ار يعرف المجرم من صوت قرمشه بونبون سيما
والاعلان بتاع ايزابيلا وات از زيس... زس از موم.. بتاع مزيل عرق موم... واعلانات حسن عابدين بتاعه شويبس
واللى بيفطسنى من الضحك فى اعلان رىرى ان الواد بيكبر هو والكافوله ودبوس الكافوله كمان

السبت, 06 أغسطس, 2005  
Blogger مــهــــاجـــر said...

وش مكرمش

إعلان ريرى من الإعلانات القليلة التى ما زالت بذاكرتى ، وهو الإعلان الوحيد - على ما أعتقد - الذى ترى فية طفل يمسك بالببرونة برجلية.

وإعلان آخر يعتبر من كلاسيكيات الإعلانات فى مصر وهو إعلان بنبون سيما بشقية القديم = " مستر كوجو " و "نابليون"

دعنا نتحدث عن الإعلانات التى كانت لها تأثير غير طبيعى على الناس :

بيتهيألى إعلان " إنس عمرو" و إعلان " جه بالشيفورلية وإحنا أعدين.. حمل الشيفورلية وإحنا لسة برضو أعدين .. وصباحو أرررر يا سيدى" من الإعلانات التى لمست جانب السخرية والفكاهه المتأصلة لدى الشعب المصرى .

إعلان آخر له وقعة - بالنسبة لى على الأقل- إعلان " سمن الهانم " حتى أنة كان هناك لزمة فى الإعلان كانت على لسانى دائماً ،للأسف ليست على بالى الآن، لو حد عارف نص الإعلان يقولى علية .

أما إعلانات شيكولاتة كادبورى فأنا أكاد أتوحد معها وأحس بالضياع مع مشاهدها المختلفة وأعتقد إنها أرقى إعلانات حتى الأن

أما أسوأ إعلان شوفتة فهو إعلان مستشفى سرطان الأطفال " أنا أسمى أحمد وعندى سرطان.." بأحس فية نوع من الإبتذال والإستغلال والتلاعب ... مش عارف المهم إنى مش بطيقة

الأحد, 07 أغسطس, 2005  
Blogger Romantic Rose said...

اعلان ريري كان مضحك و رقيق و اعلان مستر كاجو اللي بيعرف المجرم من قرقشه بنونبون سيما فرش كان ممل لان الممثل كان مدعي الكوميديا و هو دمه يلطش و اعلان حسن عابدين .. سر شويبس .. فضل يدور علي السر لحد ما مات الله يرحمه .. دلوقتي اللي بيعمل اعلانات المياه الغازيه هم عمرو دياب و اليسا و احسن لعينه الكوره ف العالم "بيبسي" و نانسي عجرم "كوكا"..يعني هي هتيجي علي الاعلانات .. بجمله العولمه في غياب المضمون.

الأحد, 07 أغسطس, 2005  
Anonymous غير معرف said...

:جيل السبعينات
أرتيف بالفلورين معجون الحلوين
خضر العطار : احمد عدويه
مصر للتامين : المسلسل امتي؟

الأربعاء, 10 أغسطس, 2005  
Blogger arabesque said...

اعلانات السمنة ياجماعة أثرت أوي مع الشعب المصري:

"دي سمنة الشمس الدهبية...أفتحها ما تقطعش ايديا"
"ياأم طاقية ..طاقية حمرا..للهانم البيضا .. و الهانم السمرا"

وطبعا اعلانات اريال أووه أوووه اللي انتجت الفكر السياسي الجديد و أثرت بشكل مباشر في دعايا الحملة القومية الانتخابية المهلبية

اعلان الفياجرا بتاع الشاليموه غبي و أختي الصصغيرة بتصر تحرجني و تسألني هو دا عن ايه بالضبط و أنا طبعا أرسم تعبير البلاهة التمام و أقولها معرفش

وفعلا زي ما قالت غادة اعلانات المحمول عموما جميلة و عملت نقلة كده في الاعلانات
وبيعجبني أوي اعلان السعودية لتشجيع السياحة الداخلية "تعرف على المملكة" رغم اني مارحتش هناك ولا حاجة بس تشجيع السياحة الداخلية بطريقة اتعرف أكتر على بلدك جميلة جدا

الأربعاء, 10 أغسطس, 2005  
Blogger arabesque said...

سوري يا جماعة
"افتحها ما تجرحش ايديا" :)

الأربعاء, 10 أغسطس, 2005  
Blogger sydalany-وش مكرمش said...

ساحر الصحراء:
إعلان هارتي ما كنتش باحبه عشان البنات اللي فيه كان منظرها أهبل أوي و كانت الألوان فاقعة

mr biboooo:
ان إسم الحمامات دي جرافينا

nefsy:
الإعلانات المتعبة دي ما كنتش بافتكرها عشان ما أنهجش و أتعب و أصدع

ghada:
شكرا
بالنسبة للإعلانات طالما كاتبها يبقى علقت معايا و أثرت فيا بشكل أو بآخر

و حكاية تلميح نضيف دي مالهاش معني لإنه لو كان بالنضافة دي ماكنتيش تكتبي تلات نقط و تسألي عارفينه ..لكن ما أنكرش إنه عاجبني

bavalvo:
إعلان نايتي ده أنا فاكره جدا ..مرتبط معايا بسينما الأطفال أيام عفاف الهلاوي..كان دايما ييجي قبل و بعد البرنامج

mindonna:
و يعني يا دكتور الفيجرا محتاجة إعلانات دي أأشهر من ال...يعني معروفة جدا ..و في الحاجات دي بالذات الإنتشار بيبقى واسع


y mejahed:
لا يا عم ما فيش مشاكل ولا حاجة دول حتى صعبانين عليا ..حبة بنات شفيافها يا عيني كبيرة ف ما بيعرفوش يقولوها غير كده

الخميس, 11 أغسطس, 2005  
Blogger sydalany-وش مكرمش said...

az:
فعلا كانت الكفولة بالدبوس بيكبروا..لما قريت تعليقك ما عرفتش أمسك نفسي م الضحك


مهاجر:
سمن الهانم أم طاقية حمرا..متتنساش دي

و أسوأمن إعلان السرطان ..إعلانات أكفل طفل يتيم معاق ..كانت بتتعبني فعلا

romantic rose:
lol
عندك حق ..ما كنتش بحب إعلانات مستر كوجاك دي لإن الممثل كان غتت أوي


الأخ أو الأخت المجهول:
مش فاكر يا حج ..اللي إنت بتقول عليه ده كان قبل ما أتولد

أرابيسك:
للأسف ما شفتش إعلانات السعودية

الخميس, 11 أغسطس, 2005  
Blogger sydalany-وش مكرمش said...

و آسف يا جماعة على تأخير الرد

و إن كان التأخير ده طلع على عنيا في الآخر
بص على الردين اللي فاتوا حتعرف إن عنيا وجعتني

الخميس, 11 أغسطس, 2005  
Blogger prince of darkness said...

اسف يعنى بس اعلان فياجرا أنا شايف انه كان مبتكر مبتكر مبتكر فعلا
كل ما أشوفه انا و الشلة نضحك ضحك
معلش بقى مراهق

الأربعاء, 17 أغسطس, 2005  
Blogger sydalany-وش مكرمش said...

آسف ليه

كل الإعلانات اللي أنا كاتبها معلقة معايا
يبقى طبعا بحبها
بإستثناء إعلانات الفوط الصحية

الخميس, 18 أغسطس, 2005  
Anonymous غير معرف said...

Best regards from NY!
» »

السبت, 16 ديسمبر, 2006  
Anonymous غير معرف said...

montenegro dated urfont pope glare unsubscribe tradition herbocare regime speculation meal
semelokertes marchimundui

الأحد, 20 ديسمبر, 2009  

إرسال تعليق

<< Home

جميع حقوق النقل و الطبع محفوظة لصاحب المدونة©