الخميس، فبراير ٢٢، ٢٠٠٧

هذا ما يحدث كل يوم من أيام البيات الشتوي

قاعد ما بين اربع حيطان
جوا سجن الوقت و الخوف م الزمن
و القلب أديق م المكان
و ما عدش قادر يحتمل صوت الوجع
بيعدي فينا كل يوم اصناف كتير تشكي آلامها و تعترض
و تخبي ف عيونها الدموع
يشكولي من وجع السنان
يشكولي م البرد اللي كلبش ف الضلوع
يشكو عيونهم و الودان
يشكو حصاوي في الكلى
يشكو البلاوي اللي ف عقولهم و ف قلوبهم و البيوت
يشكو متاعب عجزهم فوق السرير
يشكولي م الخمرا و من شرب الحشيش
كل القذارة المقرفة
حتى البنات من غير خجل
بيعلوا صوتهم لما ييجوا يطلبوا مني حاجات
قادرة تحمر وشي من كتر الكسوف
و إن سبت ودني للزبون
حيشكي من طول اللسان
و من عناد البياعين
من سواقين التاكسي ...من شر الطريق
يمكن كمان تطلب معاهم يشتموا
كل اللي قاعدين ع الكراسي مرتاحين
كل اللي ماسكين البلد
من أول الريس لظباط المرور
و القلب بيكمل سمع
فيشكوله
.......و يتحمل
..و يشكوله....و يتــ حــمـــل
و يشكوله ..........و يتــ حـ مـــل
و يشكوله .......
فساعتي تدق دقاتها
و تكتب أمر إفراجه
فيتحامل على نفسه
عشان يقدر ياخدني البيت
فأحكيلهم و أشكيلهم هموم اليوم
يلاقي الكل ف سريره
فيشكي همومه ف وداني
يقولي قصيدة ع الشكوى
فَــَأ ُلقيها على الحيطة
و أتكوم على سريري
و أحاول أنام

3 Comments:

Blogger نهر الحب said...

سعيده جدا اني اول تعليق عندك بعد البيات الشتوي
بس انت ليه حزين كده؟؟

لازم نتحمل لانها الحياه

يا تري لسه فاكرني؟

اتوقع زيارتك

الأحد, ٢٥ فبراير, ٢٠٠٧  
Blogger عين ضيقة said...

وياترى هتعرف تنام؟

تحياتى ياباشا

الأحد, ٢٥ فبراير, ٢٠٠٧  
Blogger admelmasry said...

بصراحه
مش لاقي كلام يتقال

حللللللللللوة قوي لدرجة اني منتشي جدا


تحياتي

الاثنين, ٢٦ فبراير, ٢٠٠٧  

إرسال تعليق

<< Home

جميع حقوق النقل و الطبع محفوظة لصاحب المدونة©