أربع شهور فاتوا ....يا ترى لسة فاكرينِّي
لكم وحشة
حاجات كتير حصلت في الأربع شهور اللي فاتوا
أحكيلكم إيه ولا إيه
أحكيلكم عن الإمتحانات و الشفوي
و لا أحكيلكم على سفرية مطروح اللي فيها إتحقق الحلم بالظبط .....و رحت زيارة 4 ساعات أمن الدولة
و لا أحكيلكم عن النتيجة
و لا ....ياااااااه في حاجات كتير تانية
أبدأ منين
مش عارف
حاسس إني بأعمل أول تدوينة ليا ف حياتي
.......................................................................
كلمات من ضهر ورق المذاكرة بعد آخر إمتحان
دلوقتي بس
أقدر أقول
عشرين سنة عدت كده
-ف طرقعة صوباعين-
...............................................................
حاسس إني غريب
و التدوين حدث أسطوري كنت بعرف أعمله أيام ما كانت القصور من رمل و المراكب ورق
دلوقتي ...مع إن المراكب لسة ورق و الرمل مغرق إيديا ...مش قادر أتكلم عن حلم ما أتحققش ولا عارف أتكلم عن القصر اللي لسة ما أتبناش
أقولكم......أتكلم طوبة ....طوبة ....طوبة ....طوبة ....وأوعدكم لما نخلص كلام حتلاقوا قصر يساعنا كلنا
ملحوظة: الكلام -غالبا-ما بيخلص و حتستنوا كتير
..........................................................
أنا ...أنا
أنا
أنا
مش شايفني كويس دلوقتي
خليها إنتم
إنتوا
إنتوا
بقالي كتير ما شفتكوش
طب هم
لأ بلاش
يجعل كلامنا خفيف عليهم
.......................
..................
.................
..........
posted by sydalany-وش مكرمش @ ٧/٣٠/٢٠٠٦ ٠٩:١٦:٠٠ م
12 Comments:
ايوة فاكرين
خش فى الموضوع على طول
أزال أحد مشرفي المدونة هذا التعليق.
اهلا
حمد لله ع السلام والنتيجة بقى والحاجات دى
زعلان على 20 سنة... عادىىى
بكرة تلاقى 60 سنة عدت من غير ما تفهم همه ضاعوا فى ايه
مش فاهمة اية موضوع الحلم و امن الدولة ده ممكن افهم؟
كل عشرين سنة و انت طيب
فينك
والله لك وحشة
وخصوصا الراجل العجوز اللى بينط لى فى الصفحة اول ما ادخل عندك
حمد الله على السلامة
احكى على كل كل حاجة
على فكرة انا غيرت عنوانى
بقى
http://tayarawara2.blogspot.com
الله يرحم الاحلام الحلوة
حمد الله ع السلامة
نورت التدوين
نورنا وشرفنا بالزيارة
حمد الله على السلامة .. ومبروك على اول عشرين سنة ف حياتك .. اول عشرين سنة دي بقى بتختلف تمام عن العشرين سنة اللى بعديهم اللى بتختلف بالطبع عن العشرين السنة التالية وعشان كدة هي العشرين الوحيدة اللى بيتقال بعدها : ايه ده انت دلوقتي في العشرينات .. وده طبعا عشان تعرف غلاوة العشرين سنة اللى انت هتمر فيها وبكدة تبقى العشرينات من السنوات حاجة جامدة جدا لازم نهتم بيها كلنا ونشيلها جوا عنينا .. وانت عامل ايه دلوقت ؟ .. هيثم 19 سنة :)
كل سنة وانت طيب واجازة سعيدة
حمد الله ع السلامة ياعم
إسمك وش مكرمش
كويس والله
حضرتك معانا من الأول ولا لسة راكب
والله وليك وحشة يا وش
ماتكسلش تانى بقى
i turned 20 last month
i am really depressed about cause i feel i have done nothing to justify these 20 years
i am afraid the next 20 years are going to be the same
nad
كفاره يا عم .. انت باديها ألغاز كده ؟؟
ألف حمد الله على سلامتك
يا ريت بس حبة تفاصيل الله لا يسيئك
إرسال تعليق
<< Home