الأحد، يناير 22، 2006

مش مهم أكتب عنوان و بوجه عام ده مش موضوع واحد دي دوامة


الواحد بيقضي عمره و هو بيدور على نفسه
أو بيدور على واحدة يحكيلها عن نفسه
ده يمكن اللي بيخلي ناس كتير تكتب شعر عشان يدوروا على نفسهم
و لما يتجوزوا يبطلوا كتابة لإنهم لقوا واحدة يحكولها عن نفسهم اللي ما لقيوهاش أو لقيوها ف الواحدة دي
..........................................................
الفرحة البيور
ال به جة
البهجة
فرحة+ سعادة+إحساس جميل بالرضا=بهجة
أنا ما باتكلمش عن نظرية البهجة ولا حتى تأويلاتها
لو سألت نفسك و لو للحظة إنت ليه سعيد و مبسوط فرحتك حتضيع
...........................................
مش حيصدق فرحت له قد إيه
..........................................
في مثل شوفته ف الحقيقة مع ناس تانية"إمشي ف جنازة ولا تمشيش ف جوازة" و ناس كتير زعلوا من بعض بسبب جوازات متوفقة
لكن ف المقابل في ناس بتحب تمشي ف جوازات "و يا بخت من وفق راسين ف الحلال"و بيكونوا سعداء أوي
...........................................
يااااااااااااااااااااااااااااااااااااااااااااه
إحساس سعيد ...بالأبوة...جايز
القلق اللذيذ ...عارف إن إبنك سعيد و نجح ف مهمته
إنت شايفه من بعيد مبتسم و حاسس إنه بيقول أحلى كلام لكن ..لما تبقى عارف إن إبنك نجح بتبقى فرحان لكن بيبقى نفسك تعرف جاب كام ف المية
......................................
يااااااااااااااااااااااااااااااااااه
مفيش راجل يقدر يفهم بنت
صاحبي اللي كان حاسس إنه ف طرف العين مش تحت النظر لقى نفسه قرب القلب و مش بعيد جواه
قبل ما أنسى يا ريت تدعوله ربنا يوفقه للي فيه الخير و يجعلوا الخير في اللي إختاره
.....................................
تفتكروا النصيب بييجي مرة واحدة
ولا لو الواحد سعى النصيب بيييجي
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
...................................
مستنيكي
حتييجي قريب
ولا حفضل مستني؟؟
و لو جيتي حعرفك؟؟؟
و لا مش حعرفك؟؟؟؟
بس أقولك
إنت تعالي و نبقى نشوف
.............................
خلصت الإمتحان و مش لاقي حاجة أعملها غير إني أروح أتدرب ف الصيدلية
مع إن دي آخر أجازة ترم ممكن ف حياتي آخدها
.............................
أنا لسة مستني الفرج
تفتكروا حيعدي من هنا و لا أستناه ف حتة تانية
..........................
فرحانلك أوي
مش عارف ليه مستعجل إني أشوف حد من إصحابي متجوز
يمكن عشان ده حيحسسني إن الدور عليا و أبدأ أدور بجد
بس مش بعيد أكون أنا أولهم من غير ما آخد بالي
.................................
أوقات كتير ما بابقاش عاوز م الدنيا غير كنبة أمدد عليها و ريموت كنترول و نص كيلو شكولاتة
و أوقات أكتر ما با كونش عاوز غير إني أبقى ف مساحة فاضية ما فيهاش حد غيري و برضه معايا نص كيلو شيكولاتة ...و يا ريت تكون كادبوري
و أوقات أكتر باتمنى إني .........ياااااااااااااااه كل ده وقت قعدت أفكر فيه من غير ما أعمل حاجة في حياتي
................................
مش مستني منكم غير مساحة فاضية
و نص كيلو شيكولاتة
و يا ريت لو سمحتم تكون كادبوري
.

19 Comments:

Blogger Romantic Rose said...

بزمتك مش حلو احساس الفراغ ده ؟؟
ده احساس رائع بعد الزحمه و الدوشه و السهر و القلق .. بتبقي حاجه تجنن من الجمال .. بس لو زادت بتقلب بملل .. بس ربنا يبعد عننا الملل ..

مبروك لصاحبك .. و العاقبه لك قريبا ان شاء الله ..

المساحه الفاضيه و موجوده .. و الشيكولاته الكادبوري موجوده برضه .. بس نصيحه تجيبها من بره "الامارات او الكويت او السعوديه" هتحس ان اللي بتاكله هنا عجينه كوفارتينا.

كل سنه بقي و انت طيب ..

الأحد, 22 يناير, 2006  
Blogger Lasto-adri *Blue* said...

خلصت الإمتحان و مش لاقي حاجة أعملها غير إني أروح أتدرب ف الصيدلية
مع إن دي آخر أجازة ترم ممكن ف حياتي آخدها


تعالى خد اتنين كيلو مشاريع من اللى عندنا
يابنى بلاش افترى لتاخد عين ف الاجازة اللى عندك وغيرك متحسر على نفسه
:@ :@


عموما متخفش.. هى ح تيجى.. و ح تعرفها.. دا مقدر ومكتوب من قبل ما حتى تسأل


وعلى فكرةيعنى
كادبورى مش بالكيلو.. وغير كدة او كدة، لو نظام شحاتة يبقى اشحت حاجة عليها القيمة اكتر
:P :P
يعنى قول
le notre
ولا حاجة يعنى تستاهل
;)

ع العموم عود أحمد ومحمد عبد السميع

الأحد, 22 يناير, 2006  
Blogger ماشى الطريق said...

أنا عارف الإحساس اللى انت بتمر بيه و بتكتب بيه الكلام ده
لما الواحد بيكون بيفكر فى 1000 حاجة فى نفس الوقت ويقعد يكتب كلام و كلام ملهوش أى علاقة ببعضه
الفراغ دائماً قاتل
بخصوص الشيكولاتة أنا فعلاً جبتلك نص كيلو شيكولاتة بس و انا جاى فى السكة سامحنى أكلتها
تمشيها عسلية

الأحد, 22 يناير, 2006  
Blogger Dalia Fouad said...

أحاسيس متداخلة وكتيرة بس واقعية لأنى حاسة بيها زيك
جميل اوى

الأحد, 22 يناير, 2006  
Blogger lost in the life said...

صدقني مش عارف ابدا أزاي
هبدا واقول السلام عليكم انا حسام من مصر
احب اقولك حاجة انت اقرب انسان شوفت حالته من حالتي في حياتي
ساعات كتيير بحس اني تايه وببقى محتاج حاجةومش عارف ايه هي
احتياجاتي كتيير ومتغيرة
نفسياتعرف عليك حقيقي يسعدني فعلا اني اتعرف على شخص ذبك لوسمحت راسلني
specialman19@hotmail.com
www.hos9.net.tc
من فضلك ترد على تعليقي وتبعتلي اضافة لأيميكمحتاج اتكلممعاك
اولا لأني ابقى سعيد لو اتعرفت عليك
ثانيا عاوز اتعلم منك شوية حاجات خاصة بالبلوج
على فكرةده احسن بلوج قابلته على النت
فعلا بلوج لطيف ولذيذ ومتنوع

الثلاثاء, 24 يناير, 2006  
Blogger ETFOKHS said...

البلوج متعوب فيه أوي
ربنا معاك
بس نفسي استفسر عن كيفية
1-ادخال الصوت على البلوج
2-الساحر الذي يقول(سلام)
3-الصور المتحركة
معذرة لتعطيلك

الثلاثاء, 24 يناير, 2006  
Blogger Eman M said...

بدل الكادبورى، أحلى حاجة فشار سخن و كتييييييير :):)

حلوة التدوينة أوى

الثلاثاء, 24 يناير, 2006  
Blogger Moia said...

ان شاء الله حتيجى ولما تيجى حتحس انك كان ممكن تستناها اكتر من كده بكتييير بس المهم انها تبقى هى مش حد تانى

الأربعاء, 25 يناير, 2006  
Blogger wa7d mn el e5wat said...

حلوة جدا المدونة دى , اصل انت جبت طريقة تفكير 70 % منا كشباب يعنى

و الموضوع ده الواحد بيفكر فيه كتير , لان فعلا الموضوع ده نصيب , يعنى ممكن تكون بتحب واحدة بتحب واحد بيحب واحد بتحبك !!! انا مش فاهم اللى انا كتبته و مين بيحب مين؟؟؟ (:

بينى و بينك انا شايف ان مفيش حب حقيقى فى سننا , بس هو اعجاب شديد جدا
يخلينا نفتكر انه حب ,لكن فى اعتقادى لا يرقى لدرجة الحب , و المشكلة و اعتقد ان كلنا بنقابلها و هى انفصام الشخصية

يعنى مثلا انا بحب بنت و هى متعرفش , حاقول خلاص هى مابتحبنيش و الموضوع انتهى و انت عارف الكلام الاهبل ده و يبقى نفسك ان هى تقوللك اى كامة عشان تبقى سعيد , و تعالى نتخيل ان هى بدات تبادلك نفس الشعور ,ساعتها حتكذب احساسك و تقعد تقول فى نفسك هى بتحبنى .... اكيد لاء , و تفضل تكلم نفسك , هو الانسان كده يدور ازاى يفضل زعلان

و اعتذر للاطالة بس موضوعك جميل اوى

الأربعاء, 25 يناير, 2006  
Blogger عشقك ندي said...

انت تستاهل كيلو شوكلاته علي المدونة الجميلة دي بس نصيحة أيام الفراغ دي عيشها واستمتع بيها زي ماهي كده لانك قدام حتبقي محتاج شوية فراغ وحتقول فينك يا ايام الفضا

الأربعاء, 25 يناير, 2006  
Anonymous هشام said...

شكرا على الزيارة اللطيفة.و اتمنى البقاء على تواصل.مدونة جميلة حقا

الأربعاء, 25 يناير, 2006  
Blogger rubyeldaly said...

أزال أحد مشرفي المدونة هذا التعليق.

الأربعاء, 25 يناير, 2006  
Blogger rubyeldaly said...

متسمعش كلام عشقك ندى ودور باجتهاد على نصك التانى واتجوز بسرعة وليك علية اجيبلك ساعتها 2 كيلو شيكولاة وكادبورى كمان يلالالالالالالالالالالالالالالالالالالا

الأربعاء, 25 يناير, 2006  
Blogger aliaa abdalfatah said...

فعلاااااااااااااا جميل جدا
إلى الأمام دائمااااااااا
وأتمنى التواصل دوما

الخميس, 26 يناير, 2006  
Blogger ka3'eem said...

اعدة الكنبة و الكادبوري = وش مكرمش .... اوعاك منهم

الخميس, 26 يناير, 2006  
Anonymous غير معرف said...

قليل اما بقرا خواطر فى اى بلوج واحس انى متغاظة لانى مش انا اللى كتباها
باستثناء ان اجازة نص السنة عندى كانت مشحونة بطريقة مرهقة جسديا ونفسيا ,,,ومبحبش حد يقول انه كان فاضى لانى لا لحقت ابقى فاضية ولا لحقت انزل اسلم على صيدلية
عجنبنى باقى الكلام...مش مهم اتفق او اختلف ,,
walaaz

الاثنين, 20 فبراير, 2006  
Blogger shababik said...

الواحد بيقضي عمرة وهو بيدور علي نفسة او بيدور علي واحدة يحكيلها عن نفسة..........تحفةوبردة مستنيكي هتيجي قريب
المهم عايز اسالك العروسة احسن ولا كيلو الشيكولاتة الكادبوري مع العلم ان الشيكولاتة مهما كانت لذيذة بتخلص بردة ولا اية

الأربعاء, 22 فبراير, 2006  
Blogger sydalany-وش مكرمش said...

مكسوف منكم أوي

نزلت البوستات اللي بعدها من غي ما أرد على حد

ملحوقة

:0)

الخميس, 23 فبراير, 2006  
Anonymous غير معرف said...

This is very interesting site... industrial real estate site Maikes apartment Asthma all stars poster Online purchase vitamin apartments 32828 real estate for sale san Searchit.com results for 10mg celexa Change code dvd player region zenith

الجمعة, 16 فبراير, 2007  

إرسال تعليق

<< Home

جميع حقوق النقل و الطبع محفوظة لصاحب المدونة©