السبت، يناير 07، 2006

كاس اللذة


طعم الدنيا
الباقي على لسانك
بيعلم قلبك
يشرب مع ذاتك كاس اللذة
و يمِز بروحك
فيطير العقل
و يخلي إيديك
تعمل خيالات
ع الحيط
فار.. أرنب..
كلب..حمار..
..جايز تعلب
أو إنسان..ممسوخ
أو واحد
بتنط عليه الكف التانية..شمالك
و تفك ملامحُُه خمس شمعات
مَطفية
و الدنيا
لو مسكت إيدك مش حتسيبها
حتشدك ليها
و حتاخدك..لفوق
لأ..لفوق
لأ..لفوق
لأ....
.........وقعت
تِفُوق
حتلاقي الدنيا
ما سابتش ف كفك
غير ريحة ما بين
سبابتك ..و الوسطي
حتنفر قلبك منها
تغسل إيدك..
..تسبيح
و تعطر فوقها
برفان الحكمة
و تضيع طعم الدنيا
الباقي
على طرف لسانك
بلبان الذكر
و تهادي الذات ..و الروح
حلويات القلب
ما القلب إتعلم
إنه يفل اللذة
..............
.
.....باللذة
M.S

3 Comments:

Blogger Dalia Fouad said...

مش عارفه أقولك ايه؟
أول ما دخلت البلوج حسيت بانبهار من الجمال والروشنة
موضوعات حلوة واخراج جميل
برافو
سعيدة جدا انى عرفت البلوج ده

الأربعاء, 11 يناير, 2006  
Blogger La brize said...

الله!
اجمل ما فى القصيده ده من وجهه نظرى انها بتدخل للدم على طول من غير كلاكيع و عقد و مناهده
تعرف لما الدنيا تعدى بين شفايفك ساعة الذكر و تلاقيها حلوه اوى غمض عينيك و قبل ما تدوب فيها قول الللللهه!
واحمده هتلاقى طعم الذكر بقى طعمها و احلى كتير

الأحد, 15 يناير, 2006  
Anonymous غير معرف said...

Best regards from NY! » »

الخميس, 22 فبراير, 2007  

إرسال تعليق

<< Home

جميع حقوق النقل و الطبع محفوظة لصاحب المدونة©