كلكوا عليا ولا إيه

ياااااااااااااااااااه

إيه الحكاية

بنت مصرية تبعتلى تقولى عملتلك تاج

بعدها @z3NaFو

حادي بادي كرمب زبادي

حرد على بنت مصرية الأول لإنها هي اللي لحقت تحجز

توووووووووووت

القطر طالع م المحطة

تييييت تيييييييييت تييييييييييييييييييييييييييييييييييييت

الشوط الأول م الماتش خلص و دلوقتي الإستراحة

سبع حاجات عاوز أعملهم

أولا: عاوز أذاكر عشان آخر سنة تعدي على خير

ثانيا: عاوز ألاقى موضوع لبحث عشان أشارك ف ال

"world diabetes day"

ثالثا: عاوز ألاقي سبع حاجات عاوز أعملها

رابعا:عاوز آخد دورة حياة البني آدم العادي يعني أتجوز و أتكاثر و أعجز و أموت

خامسا: عاوز أكتب ...عندي أفكار قصص قصيرة جاهزة على الكتابة و شعر فايض جوايا لكن ماليش نفس أكتب

سادسا : عاوز أسافر رحلة طويلة أكتر من شهر

سابعا:عاوز ألاقي مكان أوديله الكاميرا الديجيتال تتصلح عشان حاسس إن الدنيا ماشية معايا بالعكس كل يوم ألاقي مناظر و تراكيب جميلة تستاهل تتصور أكتر من اللي قبله....لو حد يعرف فين توكيل الصيانة بتاع سوني أو بناسونك ف إسكندرية يقولي

هيييييييييييييييييييييييه

خلصت أول سبعة

يا مهوِّن

سبع حاجات ما باعرفش أعملهم

أولا:إني أقف على إيديا..صعب جدا

ثانيا:إني ألعب ضغط أكتر من عشر عدات

ثالثا : إني أنط من القطر قبل ما يقف

رابعا:إني أفتح عنيا و أنا باعطس...مستحيل

خامسا : إني أصدق مقالات رؤساء تحرير الصحف الحكومية

سادسا: ما أعرفش كمان أقول نكتة مقتنع إنها بايخة و أخلى الناس تضحك عليها

سابغا :ما أعرفش أمسك القلم عدل...بكتب بطريقة غريبة

وآدي تاني سبعة خلصت

سبع حاجات بقولهم دايما

أولا: بإذن الله

ثانيا : ربنا يستر

ثالثا : "النقطة ف حاجة"="المشكلة ف حاجة" لازمتين لازقين معايا اليومين دول لجذب الإنتباه

رابعا:"إيه ياشا..كيف حالك"و كيف بتليين الياء حلو تليين دي مش كده

خامسا :"الحمد لله" ربنا يدومها

سادسا: إنا لله و إنا إليه راجعون

سابعا: "اللي طلع الفيل فوق السطوح قادر ينزله" دي متلازمة مع الإمتحانات عشان بكون متأخر أوي في المذاكرة

سبع أشخاص حأدبسهم ف الموضوع

زرياب

جيفارا

و أول خمسة يوافقوا على التاج