و مازالت الخوازيق تتوالى

أول حاجة حقولها

هيييييييييييييييييييييييييييه

أنا رجعت

رجعت

رجعت لإسكندرية ف أجمل حالاتها من غير مصيفين

رجعت

كفاية كده رجوع

كان المفروض أول ما أرجع أبدأ أحكي عن سوريا و عن الرحلة خاصا إني مصور خمس أفلام زائد 206 صورة على الكاميرا الديجيتال ...قصدي المرحومة...غير 17 فيديو

و فعلا الرحلة مليانة مواقف و مشاكل و حاجات حلوة و وحشة

كنت فعلا راجع سخن للتدوين

و كانت الخطة كالآتي

أحمض الخمس أفلام و أنزلهم كمبيوتر بالكاميرا الديجيتال "اللي لسة شاريها من سوريا" و

كان الخزوق الأول:

الدي إس إل فاصل

يعني مافيش نت ف البيت

يعني الخطة إضربت من أساسها

قلت مش مهم

حبة و حييجي

أعمل المواضيع و أسيفها ورد بعد ما أطلع الصور

و فعلا وصلت الإتنين

يوم التلات الصبح رحت أحمض الأفلام

و كان التسلم التلات بالليل

الخازوق التاني:

أنا وصلت إسكندرية الإتنين الساعة 8

فطرت وقلت أتصل أسأل عن ميعاد مسابقة الجمهورية ف الشعر و بقية الحاجات

رد عليا الراجل و قالي ما أعرفش بالظبط بس فيه واحدة ف سنك مسافرة الإسماعيلية النهاردة بالليل

و قالي إنزل إسأل ف مركز شباب النصرعشان فيه المركز الرئيسي...نزلت

علما بإني لسة جي من سفر بري

زائد إني ساكن ف المندرة و مركز شباب النصر ف الغيط الصعيدي يعني بعد محرم بك

سألت

و المفاجأة إن الوزارةطلبت بس شعر الفصحى و المعلومات العامة ف سني و ما طلبوش شعر العامية

و يا يطلبونا يا ما يطلوبوناش

الخازوق التالت:

قلت أوفر حجارة و أجيب أدابتور للكاميرا لإن تصوير و تلويد الصور بتاعة الأفلام على الكمبيوتر حياخد حجارة ياما

نزلت قبل ما أجيب الأفلام أجرب أدابتور

لغاية كده كويس

فيما عدا إني نسيت إني أحرك زرار الأدابيتور لتلاتة فولت

حتسألوني دخلتلها كام فولت

؟؟؟؟؟؟؟

خمنوا

إتناشر فولت

ببساطة من غير تفاصيل

شميت ريحة شياط

تصور إنك ف ثانية

بالظبط ف خمس ثواني تشم ريحة شياط 900 جنيه

الخازوق الرابع:

الغبي

رغم إني قلتله يطبع الفيلم بالكامل

ما طلعش صور المناظر الطبيعية

إفتكر إنها جت غلط

فزعقت ...و اتنلرفزت و ريحة الشياط اللي شمتها من الكاميرا ما كانتش فارقت مناخيري

الخازوق الخامس:

و هو كان حصل قبل حكاية الكاميرا لكن كان مقرر إني أروح الشقة يوم الأربع

الخزوق بالتفصيل:

-قلبك جامد؟

-إيه؟

-شقة السيوف إتسرقت

-مين

-شقة السيوف إتسرقت

-إيه اللي إتسرق؟

-أديك حتروح تشوف

رحت...

كتب تفسير الشعراوي

موسوعة المعرفة

مجموعة كبيرة من أمهات الكتب

الكتب الكبيرة القيمة اللتي صدرت من مكتبة الاسرة من بدايتها للآن

أربع أبواب عربية

باب الحمام الألوميتال

حنفيات الحمام و المطبخ

آلات حاسبة كاسيو منها إتنين بيانو يعني بيعملوا موسيقى مختلفة لكل زرار

كل ده إتاخد

و إبن ال.... قعد و فرز الكتب براحته و دخل الحمام و....من غير ما يضرب السيفون

لكن كل اللي فات ده ما زعلنيش قد ما زعلتني الطوابع

الطوابع دي الحج جمعها ف الخمسين سنة اللي فاتوا

و كانوا متنطورين و أنا بغبائي لميتهم ف شنطة واحدة

آلاف الطوابع القيمة اللي عشان بس ألمها من غير ترتيب خدت مني 9 ساعات

يعني الشنطة اللي خدها تقدر بآلاف الجنيهات

و أكتر

الخازوق السادس:

إكتشافي إن الدراسة يوم السبت

الخازوق السابع

أنا قلت بعد اللي حصل ده أروح عن نفسي

زرياب إتصل بيا و قالي رايحين الجزويت عشان نتفرج على مسرحية و نقابل مدونين تانيين زي جار القمر و لون ولف و عماد شباك و جيفارا و مستر بيبو و بيانيست...و واحد كمان ما أعرفش البلوج بتاعه

لغاية كده روعة

و قابلت تجمع مدونين هايل

و كانت المسرحية سوليست و ممتعة جدا

حتسألوني طب فين الخازوق؟؟؟

بعد المسرحية طلعت مدام على المسرح و إتكلمت عن محرقة

ما فهمتش

قعدت أسأل

عرفت الحكاية

حكاية المبدعين و المثقفين اللي ماتوا حرقا

و اللي قتلني

إني كنت الوحيد اللي مش عارف

سألت نفسي

هل الخوازيق اللي قبل ده و السفر سبب كافي إني ما أعرفش مصيبة زي دي؟؟؟

و بجد

ما عرفتش أجاوب