الثلاثاء، أغسطس ٠٩، ٢٠٠٥

مع نفسي

ما حستوش قبل كده برغبة ملحة في الكتابة ولما مسكتوا القلم -الكيبورد حاليا-ما عرفتش تكتب ولا كلمة

مش عارف أحيانا الكتابة بتبقى زي النجارة ..مسمارين من هنا على حبة غرا هنا و عاشق و معشوق كلام راكب على بعضه
و مش بعيد نلاقي فنان أويمة و هو الذي ينحت أشكال أو يعطي للخشي شكل ما مميز ..فنان الأويمة ده حيطلعلنا بحتة شغل-شعر ولا قصة- قمة في المنظر و لكن لو دعبست وراه حتلاقيه بيعيد نفسه
ملحوظة:من أشهر الصنايعية في العصر الحالي سيد حجاب..عبقري قادر يلعب بالمكعبات اللي معاه-مالهاش دعوة بمكعبات بنت مصرية-و يكون اللي هو عاوزه ببساطة و بلعبة الموسيقى اللي بتيجي من الكلام اللي شبه بعضه
مش عارف
طقت في دماغي فكرة هايلة إن أي كلمة تيجي في دماغي أكتبها
حبدأ من دلوقتي
3
2
1
إيه" مش عارف" دي كان إيه لازمتها..أمسحها ولا أسيبها ..لأ أسيبها مش خسران حاجة ..هبل ..جايز ..يااه عنيا مالها ..آآه الشاشة.. أغمق الإضاءة شوية..دي ع الآخر..حاول تركز ..قول حاجة حلوة..كده اللي حيقرا حينام منك..ما و أنت جي في الترام كانت الأفكار هايصة في دماغك ..حلو الشيبسي ده أوي..بالشطة و اللمون جبته من عند الكابتن و أنا جي..مش لا قي حاجة ..يمكن العيل الصغير اللي كان نفسك تلعب معاه اللي شفته في الترام يكون موضوع كويس..و لا البنوتة الصغيرة اللي ممكن تحلف بنية سليمة إنها أجمل من أجمل بنت من اللي بيلعبوا مع عينك لعبة اللي يعيش ياما يشوف ..و اللي يتجوز يشوف أكتر..بس ..ما تخشش في السكة دي ..حياخدوا عنك فكرة وحشة نقطتين يووه أنا كتبتها..مش المفروض..نسيت الشيبسي ..حلو جدا ..مش عارف الواد مستني عند بير مسعود و حبة و حيمشي ..أقابله؟؟..ما ينفعش الأحسن أنام عشان أروح بكرة الصيدلية ..مسلية أوي اللعبة دي..هههههه....ما تقلقش هم فاهمين إن الضحك ده ف سرك ما هو مش معقول واحد عاقل يضحك الضحكة اللي إنت ضحكتها دلوقتي جواك الساعةإتنين و ربع بالليل ..مش حتعرف تخلص الموضوع كده ..حتزهقهم ع الفاضي ..و خاصة إنك عاوز تخلص الشيبسي..إكتب إنه حجم عائلي..لو شافوك حيفهموا..و الكنبة بتندهلك..هايل أوي إحساس الأنتخة ..ممدد ع الكنبة ..المريحة جدا..و بتمد إيدك ف كيس الشيبسي و الخدر مخليك بترفعها بالعافية و بتفتح عينك بلطجة عشان تتفرج على التلفزيون ..روعة على رأي كارتون ديزني شانل ..مسلي الموضوع ..بس المفروض أقفله ..بس ده مش حيتقفل بطريقتك دي غير لما أنام و ده مستحيل..طب أكتب أول تني لسان ييجي على دماغك و بعدين كبر الخط و ظبط اللون..المروحة مالها بتتهز كده..من ساعة ما خبطتها و هي على الحال ده ..مش عارف أقفل الموضوع ..أكتبلهم إيه..أقولك
..بس خلاص

معلش يا جماعة طولت بس الواحد ما بعرفش يوقف دماغه
و أجمل حاجة في الموضوع إنك لو زهقت ممكن تفوتلك سطر ولا إتنين مش حتخسر حاجة
و في الختام
تاتا..على رأي ستيتش بتاع مسلسل ليلو أند ستيتش
ملحوظة:ستيتش مميز ..ميجا أكبر..ناجا ..أخ ..أوهانا
مش مهم تفهم ده كلام بلغة التجربة الجينية ستيتش و مش حتفهمه إلا لو كنت مدمن كرتون

18 Comments:

Blogger shady said...

يخرب بيتك ايه الوش ده حرام عليك انا ناقص
بقولك ايه المره الجايه ابقا ادخل فى السكه اياها وبشرفى ما حخدش عنك فكره وحشه

الثلاثاء, ٠٩ أغسطس, ٢٠٠٥  
Blogger Eman M said...

:) To7fa!
Sa3at kete rbetgili 7alet eni 3aiza akteb 7aga w mesh 3arfa deh
bas 3omri ma garabt akteb ay 7aga tegi 3ala bali zai ma 3amalt keda, bas tesd2 fekra gamda gedan.

الثلاثاء, ٠٩ أغسطس, ٢٠٠٥  
Blogger Mr-Biboooo said...

و بصيتلهم قوى و الدنيا كانت بتشتى ففتحت التلفزيون و قولتلها وكنت خلصت عشا بالصلصلة لما الشاى وقع على ايدياواتكسرت الفازةوالحمد لله لان الاشارة كانت حمرا

وش باشا للامام

الأربعاء, ١٠ أغسطس, ٢٠٠٥  
Blogger sydalany-وش مكرمش said...

shady:
يا راجل عيب في حريم في القعدة
;0p

eman:
الله يكرمك با بنتي و ما يحرمكيش من قلمك

ساحر:
حلوة" في النهاية بعد الإنتهاء"اللي إنتا قولتها دي


mr biboo:
لو اللي إنتا كاتبه ده بناءا على فكرتي إنك تكتب اللي ييجي على دماغك يبقى كلها سنتين و حتبقي مجنون زيي
آآآهاهاهاها
:0(

الأربعاء, ١٠ أغسطس, ٢٠٠٥  
Blogger Hany Mihanny said...

بقولك ايه فكك دي دماغ حشيش صح
:-)
مهو لو مش حشيش يبقي انا اتخبلت ...من كام يوم كان عندي نفس حالتك لكن معرفتش اخرج منها
:-)
مش فاكر اني كاتب اللي قال
"انا لا اكتب ولكن الكتابة تكتبني"
شوف الفزلكه ياخي

الخميس, ١١ أغسطس, ٢٠٠٥  
Blogger moe said...

هو انا عاجبني الي كتبتة,بس لية سؤال,قريت لك قبل كدة اراء سلبية بخصوص بهاء جاهين و احمد حداد و سيد حجاب,كنت عاوز اعرف مين بيعجبك في الشعرا العامين حاليا و سابقا؟؟

السبت, ١٣ أغسطس, ٢٠٠٥  
Blogger sydalany-وش مكرمش said...

y mejahed:
هو مش حشيش
ده أنا طلعت البلكونة عملت دماغ هوا

:0p


لون ولف:
بالنسبة لبهاء جاهين..قبل ما تقولى على ديوانه في مونريان ما كنتش قريتله حاجة عدلة
و بالنسبة لأحمد الحداد ما أفتكرش إني إتكلمت عنه خالص في أي حتة
و لسيد حجاب:مش معنى أقول إنه صنايعي كويس ده ما ينفيش إنه مبدع و صعب إن حد يبقى زيه
و بالنسبة لسؤالك:صلاح جاهين..فؤاد حداد..محمود نجم...الأبنودي زمان
دول القدام
حاليا : في شباب كتير بيعجبني أوي شعرهم و أسماءهم مش معروفة

الأحد, ١٤ أغسطس, ٢٠٠٥  
Blogger mahmoud zidan said...

ايه ياعم صيدلانى الروعة دى

الأحد, ١٤ أغسطس, ٢٠٠٥  
Blogger Zeryab said...

جميلة الحالة ....دوامات الدماغ مالهاش آخر

الأحد, ١٤ أغسطس, ٢٠٠٥  
Blogger رشا عبد الرازق said...

اما حتة موضوع ... محبكش اقراه الا دلوقتي ؟ انت سالتني واشمعنى موضوع المدرس والحصان معرفتش ارد عليك ولا هعرف ... بس دلوقتي انا عارفه برد هنا ليه ، عشان انا في الحاله دي دلوقتي ، بس المشكلة اني عارفه عايزه اكتب ايه وملزمه كمان اسلم اللي هكتبه بكره ، والأفكار موجوده في دماغي والوقت كان عندي ... بس مش قادره اكتب حرف كاني عمري ما مسكت قلم ( كيبورد على رأيك ) ولو عليه اعمل زيك وأقول اي حاجه في اي حاجه لحد ما حاجه يتشعبط فيها القلم يمكن تطلع بس للأسف حتى دي مش هعرف اعملها ....

الأحد, ١٤ أغسطس, ٢٠٠٥  
Blogger بنت مصرية said...

انا جيت
بتجيب فى سيرة مكعباتى ليه
وكمان بير مسعود
انت اسكندرانى يا عم مسعود والواحد مش هنا خالص
لازم لما انزل اسكندرية بنروح بير مسعود والعيال ولاد خالتى تحف بينزلوا ويلفوا للبحر وحاجات كده
وبعدين الشيبسى المعتبر اليومين دول شيبسى اكشن.. سيبك احلى شيبسى الوحداية بخيرها كده وتحسن انك ما بتكلش قشر البطاطس اللى بيحطوه فى الأكياس التانية

الأحد, ١٤ أغسطس, ٢٠٠٥  
Blogger sydalany-وش مكرمش said...

m zidan:
تشكر


بنتت عادية:
يا ستي حبة و الكلام حيسخن
و يطلع مستوي كمان
بس للأسف ممكن يطلع و الناس شبعانة
زرياب:
ياااه
فينك من زمان

بنت مصرية:
لسة فاكرة
و أكشن ما فيش منه حجم عائلي من أول ميامي لحد المندرة
و مكعباتك دي حخطفهم منك و أقعد ألعب بيهم
:0p

الثلاثاء, ١٦ أغسطس, ٢٠٠٥  
Blogger بنت مصرية said...

ماتقدرش

الثلاثاء, ١٦ أغسطس, ٢٠٠٥  
Blogger sydalany-وش مكرمش said...

hahaha

مكعباتك عندي
المكعبات يا شحتة

حسمعك صوتها


تك ..كراك ..تك=إلحقيني


لو ما جبتيش فدية 3 كومنتات و عملتي لينك ليا على البلوج بتاعك ححط السيخ المحمي بين المكعبات و مش بس كده حجمعها على شكل أي حاجة وحشة

طاخ
السماعة إتقفلت

الأربعاء, ١٧ أغسطس, ٢٠٠٥  
Blogger بنت مصرية said...

صح النوووووووم
اللينك بتاعك عندى بقاله اسبوع

شفت بأه مين اللى عايز يتك تك

الأربعاء, ١٧ أغسطس, ٢٠٠٥  
Blogger sydalany-وش مكرمش said...

لا مؤاخذة
جت غلط دي
ليكي كومنت عندي
:0p

الخميس, ١٨ أغسطس, ٢٠٠٥  
Blogger IronMask said...

اول مرة اشوف وش مكرمش بس حلو كتير

انا لسه عم اقرا و استمتع

خليك على طول مكرمش بس جميل

:)

الجمعة, ١٩ أغسطس, ٢٠٠٥  
Blogger sydalany-وش مكرمش said...

أكرمك الله
تشكر

الجمعة, ١٩ أغسطس, ٢٠٠٥  

إرسال تعليق

<< Home

جميع حقوق النقل و الطبع محفوظة لصاحب المدونة©