لسة واصل
هيييييه
أخيرا وصلت
بعد حكايات كبيرة و كتيرة
قاعد ف بيت الشباب بدمشق بالمزة
مش حقولوكوا عن رحلة سوريا إلا لما أرجع لإن الصور -يا رب تطلع - حكاية فحرجع مصر و أحمض الفيلم و أحكيلكوا بالتفصيل الممل و موثق بالصور....يعني حشتري سكانر مخصوص
لكن دلوقتي ححكيلكوا عن الرحلة للقاهرة اللي كانت يوم 26
كنت رايح أستلم جايزة مسابقة -150 جنيه بشيك عقبال أملتك منك له لها-ف قالي عن ورشة شعر تبع إتحاد الكتاب...و وصفلي أنا و اللي رايحين معانا المكان
نزلنا يوم الجمعة الساعة أربعة ما لقيناش مشروع-ميكروباس-رحنا الموقف الجديد
إستنينا
إستنينا
و إستنينا
و ف الآخر
ركبنا زراعي
مطبات إيه و مدقات إيه
و فوق كده أخوكم زي ما وضحت قبل كده حاجة ياما جدا
المهم وصلنا موقف إسمه عبود
و أنا ما كنتش عارف حاجة فكنت ماشي و خلاص مع اللي معايا
ركبنا رمسيس
و كل ما نسأل حد عن بيت شباب المنيل يا إما يفتي ...يا إما يبصلنا كإننا قلنا كلمة قليلة الأدب أو شتمناه
فركبنا بعد فترة كبيرة من التوهة ف رمسيس
المترو
نزلنا ف الجزيرة
مشى اللي المفروض عارف السكة
و فضلت ماشي وراه
يمشي
و ماشي وراه
برج الجزيرة
يمشي
و أمشي وراه
يمشي و أمشي
وراه
نادي الضباط
يمشي
و نمشي وراه
إعداد القادة بتاع الجزيرة
يقف
و يقول هو ده المكان اللي الراجل وصفه
مقفول ....مظلم....ما فيش حد
يخرب بيت أم الذكاء
يعني بيت شباب المنيل
إيه اللي حيوديه الجزيرة؟؟؟
المهم كملنا نسأل الناس
النادي الأهلي
دخل يسأل فرد الأمن اللي على البوابة
نصيبنا كان في واحدة داخلة النادي قالتله نركب تاكسي لإنها ساكنة ف المنيل و قالتله إسم الشارع
ياااااااااااااااااااااااااااااااه
من الساعة أربعة في محطة مصر=محطة إسكندرية لأي واحد من برا إسكندرية
للساعة 10و نص
منهكين
أخدنا وجبة العشا
كان فيه ندوة شعر ف المطعم سمعنا و إحنا بناكل
و بعدها قلنا شعر
مش قلتم تفصيل ممل
إستحملوا بقى
طلعنا
غرفة 300
فيها خمس سراير دورين
و كان فيه شلة شباب من الصعيد تعليم عالي
لغاية آخر لحظة متصوررين بكم الإنهاك الكبير ده إننا ننام زي الطوبة
لكن الطوبة كان هو وصف المرتبة
و السرير قابل للإهتزاز
يعني اللي يتقلب حيصحي التاني و بالذات لو نومه خفيف زيي
و ف وسط النوم المضطرب
فجأة
سمعت صرخة مكتومة كأن حد بيندبح
فتحت عنيا لقيت شاب من الناس اللي معانا ف الأوضة-كان إسمه محمود-واقف مديني ضهره و وشه للشباك
و خد بعضه جرى على برة
و رجع بعد ثوان
سألته حصل إيه
رد بهمهمات مش مفهومة
تاني يوم سألت زمايلي
الإتنين كانوا صاحيين
بروايتهم
إنه صرخ و جرى ناحية الشباك و كأنه بيهش حاجة واقفة لى الشباك
"لما سألناه قال قطة"
و جرى بره
"لما سألناه قال راح الحمام"
و لما رجع و سألته تمتم بكلمات مش مفهومة
و جاااااااااااااااااااااااااااء الفرج
كانوا عاوزين يفضوا الأوضة
و دونا أوضة كان فيها واحدة منظرها غريب مشوها و دخلونا مكانها و أول ما دخلنا كانت طافية السجايرمغرقة الأرض
و بغض النظر كان فيه تكييف و كانت السراير مريحة فعلا
نمنا
و شوية شعر و روتين ندوات
و روحت بدري إسكندرية
و من هنا
تبدأ حكاية سوريا
تفصيل ممل برضه
بس بعد ما أرجع بإسبوع أكون حمضت الأفلام
و تبدأ الحكاية
.........
.........
......
posted by sydalany-وش مكرمش @ ٩/٠٢/٢٠٠٥ ٠٨:٣٣:٠٠ م
9 Comments:
حمد الله على سلامة الوصول يا صيدلانى
امانه يا شيخ تسلملى على كل عربى سورى تشوفوه وتقوله فى ناس بيحبوكوا اوى فى مصر
بوسلى القطر الشمالى من هنا وهنا يا صيدلانى ما تنساش
وكتر من الصور يا ريس
وياريت تصور الاماكن ما تعملش ذى بتوع السياحه وتجيبلى صور الاماكن السياحيه والكلام الخايب ده
يارب تكون رحلة سعيدة وترجع مبسوط
ربنا معاك يا صيدلانى
انت يا بنى مش بتاع بهدلة انا عارفك
هههههههههههههه معلش أزمة وعدت
ترجع بالسلامة ان شاء الله يا صيدلاني وتحكي لنا
واضح كده أن المكان المقفوول الضلمه اللى رحته وإنت فى الجزيرة .. كان مركز قياده الثورة .. والمكان ده شاف حاجات وأحداث هى تاريخ مصر بعد الثورة
مكتوبالك ياعم تيجى من اسكندريه لمصر ومن غير ماتدرى توصل لغايه عندهم
عود أحمد يا صيدلانى ... لو رحت سوريا يا ريت مترحش بلد إسمها أدلب .. عاوز تعرف ليه ؟؟ إسأل عليها
enta eeh elly gabah hena yabni !!!
leeh te3mel fe nafsak keda bas, da elly gowaha haymoot 3ashan yokhrog menha, kont khaleek fe eskendria ahsan, wala a2olak, khaleek fe soria afdal bardo :)
Welcome back, hurry with the rest of your "DETAILED" reports :D
حمد الله على السلامة
ألف حمد الله على سلامتك يا صيدلاني وباذن الله ترجع وانت محمل
بالصور ومدونات كتير تعوضنا بيها :)
الله يسلمكم كلكم
إرسال تعليق
<< Home