الاثنين، أغسطس 15، 2005

يا فتاح يا عليم




النهاردة نزلت ف مشوار أسود
إيه رأيكوا أحكيه إزاي
بطريقة صباح الفقر و لا ألف ليلة و ليلة ولا لمونة ف بلد قرفانة
خلينا بلسان ألف ليلة مع مسحة من صباح الفقر
بلغني أيها القارئ السعيد أنه في يومه و تاريخه أستيقظ وش مكرمش مغلق العينين مدلدل الأذنين مرهق كدابة "لادا" سارت على "التاني" لمدة أربع ساعات.........تحامل على نفسه و أرتدى القميص و البنطال الديرتي المزركش و نزل متعجلا
و ركب بربع دينار الدابة المتجهة ل"فيكتوريا"بتشديد الياء و كسر الراء علي وزن عموريا ..ألف ليلة بقى-و لما وصل وجد مالم يكن في الحسبان
...............................
زحام و بشرٌ أكوام ..فما كان منه إلا أن إنتظر ناقة توناية -و هي ناقة من الحجم الصغير تشبه المشروع وضيقة لأقصى حد
و لأنه عريض المنكبين
طويل القامة
ممتلئ
"من الآخر تقدر تقول تنين ..أو درفة دولاب..لأ دولاب كامل"
فلما سبق أن سردناه
ما كان منه إلا أن إنتظر توناية خالية كي يركب بجانب الحادي-السواق يعني-و مرت الدقائق كثيرة و نظر في الساعة الرملية فوجد أنه مر نصف مكيال من الرمل....إلي أن جاء الفرج
أو كذلك ظن
وقفت أمام العملاق ناقة توناية فانتهز الفرصة و قفز بجوار الحادي"السواق يعني حقولهالك كام مرة"و أنتظر الناقة "عبال ما تحمل"....و مرت دقائق أخري ..ربع مكيال من الرمل بالتمام و الكمال
فجأة
وجد الحادي-يوووه السواق السواق -ينظر إلى جانب الناقة الأيمن بتمعن و حسرة و أشار إليه بالنزول
وا أسفاه
كان "المساعد اليمين"بتاع الناقة مكسور
فسار العملاق حزينا
مكتئبا
كارها حياته و ضخامته
و في وسط اليأس
و الإكتئاب
و لعنه للحظ الهباب
و جاءه الفرج
وقفت أمامه دابة "من أم نص دينار" فركبها سعيدا فرحا كمن وجد سرة من الدنانير
و في الطريق رأى العجب العجاب
أقمشة معلقة منتشرة بشارع أبا قير كلها تبايع السلطان بولاية جديدة
و هذا كان نص بعضها
"العاملين بالعامرية للغزل و النسيج يبايعون الرئيس "
"عادل خلة يبايع الرئيس للمحافظة على الوحدة الوطنية"
و المفاجأة الكبرى
و لو مش مصدقني متعلقة نواحي نادي سموحة
"حضانة ترتلز و المسئولين عنها يبايعون الرئيس لولاية جديدة"
و أدرك الوش الصباح
و جاء مسرور من أمن الدولة حاملا "السيف أبو لمبة"فصرخت شهر زاد
مولاي
كوكو كوكو
علي يا علي
يا عترة يا فللي
و حياة سيدنا الولي فين إنت يا علي
..علي علي..علي يا علي
لا مؤاخذة
بس خلاص

21 Comments:

Blogger Bent Masreya said...

خد عندك دى
وانا مروحة النهاردة شفت يافطة كبييييييرة

فلان يبايع سيادة الرئيس
لأنه

لأنه ايه؟

لأنه الرجل الضرورة فى المرحلة الحرجة


ترجم انت بأه

الثلاثاء, 16 أغسطس, 2005  
Blogger Lone Wolf said...

امبارح الساعة 8 و نص ليلا كان في مظاهرة علي الكورنيش امام نقابة المهندسين تبايع الرئيس مبارك,اللذيذ انها كانت مظاهرة صامتة

خسارة مكنش معايا الكاميرا

الثلاثاء, 16 أغسطس, 2005  
Blogger Lone Wolf said...

علي فكرة,التدوينة لذيذة

الثلاثاء, 16 أغسطس, 2005  
Blogger Mr-Biboooo said...

فعلا الف ليلة عصرية لكن شهريار بدل ما بيقتل كل يوم واحدة بيسجن كل يوم افكار و بيقتل كل يوم احلام
رائع يا صيدلانى
و على فكرة جامدة قوى حكاية ترتليز اللى بتبايع الريس ده على اساس انه المعلم رشدان

الأربعاء, 17 أغسطس, 2005  
Blogger shady said...

لا شوفوا دى واحد معلق يافطه بتقول ايه
لا لضلال لا لتضليل لا للمضللين اطيعوا ولى الامر
انتخبوا حسنى مبارك من اجل استقرار مصر
بالله عليكم من المضلل هنا بقا ابن ستين فى سبعين اللى بينافق بكتاب ربنا ولا اقول ايه ده احنا فى بلد شيخ ازهرها سيد طنطاوى ياما حنشوف
اه صحيح يا جماعه انا ما شفتش حد بيايد اى حد من المعارضين فى حد شاف حاجه ذى كده؟؟؟

الأربعاء, 17 أغسطس, 2005  
Blogger Nefsy said...

حلو جدا جدا ولسه ياما حنشوف يفط من الحلوةايها.... نعم نعمواخترناه اخترناه ونبايع السيدالرئيس الباشا الأستاذ اللى مهنينا ومش مخلينا عايزين حاجه .. اتقل انت بس.... بس فى حاجه مش فاهماها ... يعنى ايه حادى...!!

الأربعاء, 17 أغسطس, 2005  
Blogger مــهــــاجـــر said...

عزيزى الصيدلانى

دى يا باشا أساليب علية القوم وأصحاب الرفعة أما العامة والدهماء والشعواء إلهمه إحنا فلم الصمت التام علشان السكوت علامة الرضا .. وتبقى سلملى على المترو

على فكرة أنا بتهيئلى إن على أمه لسه بدور عليه ... متعرفش راح فين ؟

الأربعاء, 17 أغسطس, 2005  
Blogger Mist said...

جميلة جدًا..
كله جميل..التدوينات..التصميم..النشيد ..العفريت..كله كله..أختي الصغيرة كانت جنبي..وهي مغرمة بالصورة اللي انت حاططها في البروفيل بتاعك..مش عايزاني اخرج من الصفحة..عشان الصور التانية كمان..
:))
محظوظة..إني زرتك

الأربعاء, 17 أغسطس, 2005  
Blogger ساحر الصحراء said...

معلش يا كبير ساعات كتير بحس بجد انك المفروض كنت تيجى ايام السيف و الرمح وتتصدر مقدمه الجيش وتصرخ باعلى صوتك ويفر القوم من امامك ويطلب ايبك ان تحارب ضمن فرسانه بكيس من الدنانير لكنك تختار شجره الدر فى النهايه بعد الانتهاء لانها ستعطيك كيس دنانير وقطعه من اللحم

الخميس, 18 أغسطس, 2005  
Blogger Guevara said...

أنا شفت يافطة بلغ الحماس بكاتبها انه قال:

نعم بالإجماع ..و بالحب..محمد حسني مبارك..و إبن مبارك.. و إبن إبن مبارك.، يعني كما قيل في الأثر:*****يا أتة ..الخيار بستة

المقطع بتاع الأتة ده من عندي

الخميس, 18 أغسطس, 2005  
Blogger sydalany-وش مكرمش said...

ياه
حرد على كل دول

بسم الله ..الله أكبر
:0p

بنت مصرية:
الضرورة في القاموس الإنتخابي معناها السبب

لون ولف:
كويس إنها كانت صامتة عشان ما يوجعوش دماغ الناس بكلام فارغ

لون ولف تاني:
الله يكرمك

mr bibooo:
شكلك مالكش في الكرتون
المعلم رشدان ده الرجل الثاني و مساعديه شنخر و صخر
أما المبايعة كانت لكرعون

shady:
على سيرة طنطاوي
ليه أكتر من إسم
سيد بيه سلكها
و سيد بيه على كيفهم
و إسمين ما أحبش أقولهم

nefsy:
يااه الناس اللي طلعت كليات من غير ما تعدي على ثانوي عام
حادي الركب هو اللي كان بيعد يغني للجمال و هو راكب أول جمل أو ماسك بناصيته و بيشده و بكده يبقى هو اللي بيحرك الركب كله


مهاجر:
آخر الأخبار اللي وصلتني عن على إنه ضرب فيزا و سافر على أمريكا
و فيه أخبار بتقول إنه إترحل على جوانتانامو
و فيه كلام إنه ف الغربانيات
و فيه كلام تاني إنه خد اللي سألته في الأغنية "كنت فين يا علي أمك بتدور عليك"إتجوزها عرفي و جاب منها على سكند إيديشن

mist:
حلوة العفريت دي
الله يكرمك يا شيخة
سؤال :أختك دي عندها كام سنة ؟؟
:0p

ساحر الصحراء:
ماشي
بس مش عجباني حكاية حتة لحمة
و سيادتك لو كنت مزنوق فيها أوي كنت تحدد لحمة محمرة ولا مشوية ولا مسلوقة عشان الواحد يعرف حياكل أنهي


guevara:
يا باشا الأتة لسة ما بطلتش ش** بقالها ييجي خمسين سنة
فانت لما بتطالبها و تقولها *****يا أتة يبقى أنت كده بتحط عليها أعباء إضافية


هييييييييييه
خلصت رد

الخميس, 18 أغسطس, 2005  
Blogger mahmoud zidan said...

لا لسه ما خلصتش ... ارجع تانى رايح فين ... هو الدخول للسياسة زى الخروج منها والا ايه ...
على فكرة ... على ابن ام على قبض عليه البوليس السياسى ... امبارح الساعة 3 بالليل ... بتهمة التعدى على الذات الملكية المباركية ... وعدم موافقته على وضع يافطة مبايعة مبارك على بلكونة بيتهم

الخميس, 18 أغسطس, 2005  
Blogger Nour said...

حتى انت يا حضانة ترتلز

أنا مقدرتش امسك نفسي بصراحة أما شفتها ناديت على أختي أوريهالها و احنا الاتنين مرميين تحت الكمبيوتر من كتر الضحك حاليا

loooooooooooooool bgad

صحيح شر البلية ما يضحك

الخميس, 18 أغسطس, 2005  
Blogger sydalany-وش مكرمش said...

محمود زيدان:
لو كنت قريت الرد اللي أنا كاتبه كنت حتعرف إن اللى إتقبض عليه ده مش على اللي إمه بتدور عليه ده على سكند إيديشن إبن على اللي أمه بتدور عليه

nour:
أنا بقى ساعة ما شفتها عرفت أكتم ضحكي بس كنت حموت من كتم الضحك
أصل مش ظاهرة صحية أبدا إني أترمي في المشروع من الضحك
ملحوظة:مشروع=ميكروباص

الجمعة, 19 أغسطس, 2005  
Blogger أنا said...

يا راجل..ياليتها جات علي علي وابنه
المهم خد عندك
" نعم لصاحب الضربة الجوية ... ولا لصاحب الطلقة الوهمية"
اكيد كان يقصدني انا بس صحبك عمل عبيط

السبت, 20 أغسطس, 2005  
Blogger sydalany-وش مكرمش said...

الطلقة الوهمية دي لما واحد يقول لمراته إنتي طاقق بالتباتة بدل ما يقولها إنتي طالق بالتلاتة
تتحسب طلقة وهمية
:0p

السبت, 20 أغسطس, 2005  
Blogger Ahmed Shokeir said...

هاها وفيها ايه ده العجل فى بطن امه يؤيد ترشيح السيد الرئيس مدى الحياه

الأحد, 21 أغسطس, 2005  
Blogger Ahmed Shokeir said...

وخد عندك دى كمان ... واحد كاتب يافطه يقول فيها نعم لحسنى مبارك ( أصله لسه فاكر انها إستفتاء بنعم ولا )على رأى الحاج أحمد الصباحى الناس مش فاهمه حاجة وبتقول أى كلام

الاثنين, 22 أغسطس, 2005  
Blogger Pianist said...

في يافطة كمان في بحري واحد فكهاني بيبايع سيادة الرئيس المبارك
انا مش فاهم الناس دي بتفكر بعقلهم يعني ولا بايه بالظبط؟
اظن ان كل حتة فيها فساد هاتبايع علي طول يعني تقدر تقول مادام في يفط مبايعة يبقي لسه في فساد

الأربعاء, 24 أغسطس, 2005  
Blogger sydalany-وش مكرمش said...

أحمد :
يعني سيبك من بتوع اليفط
يعني إحنا فاهمين حاجة

بيانيست:
مش شرط
أنا أعرف مكتب صرافة كان لسة فاتح جديد و كل ما يحط يافطة إعلانات تتششال
آم حاطط يافطة مبايعة

الثلاثاء, 30 أغسطس, 2005  
Anonymous غير معرف said...

Very cool design! Useful information. Go on! »

السبت, 17 مارس, 2007  

إرسال تعليق

<< Home

جميع حقوق النقل و الطبع محفوظة لصاحب المدونة©