الاثنين، أكتوبر ٣١، ٢٠٠٥

عزوة

أول مرة أعرف يعني إيه عزوة
أكتر من عشرين صيدلي متجمعين ف محل واحد بيفطروا سوا و كلهم يعرفوا بعض
و تصوروا المنظر...كتيبة صيادلة طالعين من المحل رايحيين نصلي التراويح ماشيين سادين الشارع

الكتيبة معدية من قدام قهوة في إتجاه الجامع
القهوجي سألنا و عنيه بتشع ذكاء و بإسلوب الواثق:إنتوا رايحين تلعبوا كورة؟؟؟؟
.....................................................................
................................................
................................
.................
سؤاله ضحكنا
لكن خلينا نفكر ف أبعاد سؤاله
لو إنت شفت مجموعة كبيرة أكتر من عشرة ماشيين مع بعض
لو بيهتفوا....حنقول دول رايحين مظاهرة
لو ماشيين مبتسمين....يبقى رايحين يلعبوا كورة
لو بيمدوا و ما بيضحكوش...يبقى رايحين يتعاركوا
و لو بيمدوا و ما بيضحكوش و أكتر من 30 نفر ...يبقو برضه رايحين مظاهرة
لوما بيمدوش و ما بيضحكوش و أكتر من 30 نفر و باصين ف الأرض ...يبقوا ماشيين ورا جنازة


يبقى و احنا بنفكر بنستبعد إنهم يكونوا متجمعين عشان يروحوا يصلوا ....أو حتى يتفسحوا
تفتكروا ليه؟؟
ف رأيي ده لإن صعب يتجمع أكتر من 10 على حاجة واحدة فيها إختيارات كتير
يعني الصلاة...عندك ف المنطقة الواحدة جوامع بعدد الشوارع
لو صفيت الشيوخ اللي ترتاح إنك تصلى وراهم حتلاقي 5 على الأقل
لو إنت مرتاح للشيخ اللي في الجامع الفلاني صاحبك الأنتيخ حيبقى بيصلي في المسجد العلاني و إنتوا إتنين
فما بالك ب21 طالب جامعي و كل واحد منهم دماغه مريحاه

4 Comments:

Blogger خجل said...

حلو كتير..اكيد كانت ليله القدر....هذه التجمعات العظيمه ..دايما في ليله القدر..

حيث يجرى هناك تعداد السكان ..وافرحي يامصر

الاثنين, ٣١ أكتوبر, ٢٠٠٥  
Blogger shady said...

كنت لسه عاوز اقولك انى شفت تجمعات كتير ذى دى ليلة القدر شباب ورجاله وستات وانسات
ربنا يزيد ويبارك ويبقى طول السنه
محتجين قوى نقرب من ربنا والمغول على الباب

الاثنين, ٣١ أكتوبر, ٢٠٠٥  
Blogger Mr-Biboooo said...

المهم هنيا انا عارفك تحب الاكل و تعزة و اعتقد نفسك اتفتحت فى الجو ده

الثلاثاء, ٠١ نوفمبر, ٢٠٠٥  
Blogger @z3nF said...

كل سنه و انت طيب
انا عملت لك تاج رد علي

الأربعاء, ٠٢ نوفمبر, ٢٠٠٥  

إرسال تعليق

<< Home

جميع حقوق النقل و الطبع محفوظة لصاحب المدونة©