تيجوا نسمي الجنيه

كنت باكتب تدوينة طويلة و مملة بعض الشئ-ما تقلقوش مش حارحمكم و حنزلهالكم في يوم من الأيام-لما طقت في دماغي فكرة

ليه ما تتسماش عملة البلد بإسم رئيسها ....أيوة
يعني نسمي الدولار بوش و نسمي الجنيه مبارك
تصوروا معايا
لما العملة بتنزل بتلاقي الناس بتقول دلوقتي الجنيه ما يساويش...مالوش قيمة ...الدولار طاحن الجنيه ...ما باخدش غير كام ملطوش....إلخ
فلما العملة تتسمى برئيس البلد أكيد حيبقى عنده إهتمام أكتر في الحفاظ على إسمه عشان يقولوا إن قيمته بتزيد
و كمان لها فايدة سياسية في الدول المكبوتة ،الناس بدا ما يشتموا في الحكومة حيشتموا العملة و ساعتها يبقى عقابهم أسوأ من اللي شتم الحكومة ....تتصادر العملة اللي معاهم بتهمة إزدراء العملة
ساعتها الناس حتقدر عملة البلد
و تفيد كمان في توريث الحكم أو نقله
فلو توريث حيبقوا مش محتاجين يغيروا إسم العملة
و لو حصلت إنتخابات حيبقى الشعارات الإنتخابية سهلة مثال:إنتخبوا من تجدوه في جيوبكم...إنتخبوا من يأتي بجميع إحتياجاتكم.......إنتخبوا عملة بلدكم
و ساعتها حيتخلق حاجة للتوريث عند الناس نتيجة إرتباط نفسي ...الناس دايما محتاجة فلوس و الفلوس تقاس حاليا بالجنيه و بعدها بالمبارك فحتبقى الناس محتاجة مبارك دلوقتي و بعدين
و بالمرة نسمي الفكة بأسامي الوزراء و تحديدا
رئيس الوزراء...النص جنيه
وزير المالية.....الريال
وزير الإقتصاد....ربع جنيه
ولا مانع ضم الإتنين
و وزير التموين .....شلن
و هكذا
و بعد ما ترجع قيمة الجنيه ممكن نرجع القرش و السحتوت و التعريفة و النكلة و ساعتها نقدر نغطي الهيكل الوظيفي المؤثر في سعر العملة

أنا عارف فكرة فظيعة
أستاهل عليها مليون مبارك
مليون على دماغي