الخميس، مارس ٠١، ٢٠٠٧

النهاردة إصطدت فراشة

النهاردة أنا فرحان أوي
مش عارف إيه أهمية اللي عملته لكن فرحان
النهاردة و أنا قاعد زهقان في الصيدلية رسمت صديق تخيلي و حطيته جنبي على البنش
و قعدت أصوره
الصراحة حاولت أسميه ما عرفتش
كل ما أبصله من زاوية إسمه اللي إخترته ما ينفعش
ده لإن شكله بيتغير
مرة رفيع و طويل

و مرة بمناخير كبيرة

المهم في الآخر حطيته ف وش الزباين

اللي أكيد دلوقتي من كتر اللي عملته إتأكدوا إني مجنون


و مش بس كده

ده و أنا باتكلم مع زبون طارت حاجة خبطتني في دماغي و طلعت فراشة جميلة جدا ....أكبر فراشة ضوء أشوفها ف حياتي ،و مع إنها فراشة ضوء من غير ألوان لكنها بلونها البني المخلوط بالرمادي و الإسود كانت قادرة ترقق قلبي ....إصطدتها ف علبة بلاستيك و بعدها حطيتها ف علبة زانتاك فاضية على أساس آخدها معايا البيت و أصورها بالكاميرا الديجيتال المهم صعبت عليا فخدتلها صورة بالموبايل و طيرتها


إحساس غريب أوي دايما يحصلي لما أصطاد فراشات من و أنا صغير ...قشعرة بتمشي
ف جسمي كله و ف نفس الوقت إحساس بلذة الصيد و فرحة التملك ....هي النشوة كاملة


مش عارف ليه دلوقتي و أنا بكتب حاسس بالندم إني ما أخدتهاش معايا و صورتها صور واضحة
لكن كل ما أفكر فيها بافتكر أغلب مصير فراش الضوء اللي إصطدته و أنا صغير ....جسم رفيع من غير جناحات و ولد ما بيعجبوش العجب و بيصعب عليه إن الفراشة تفضل من غير جناحات فبدل ما يعملها جناحات ورق بيقتلها بدابيس الإبرة



22 Comments:

Blogger نهر الحب said...

انا برضه اول تعليق
انا عاجبني قوي كلامك عن حياتك في الصيدليه
و عجبني قوي الراجل اللي انت راسمه
اشكرك علي زيارتي لكن معرفتش سبب عدم التعليق؟؟

الخميس, ٠١ مارس, ٢٠٠٧  
Blogger إبـراهيم ... said...

يا دماااغــك يا وش مكرمش ....


افرد وشـك بقى :)



تحيااااااااتي

الخميس, ٠١ مارس, ٢٠٠٧  
Blogger Hannoda said...

مبسوطة جدا انك مش من اللي عندهم هواية صيد الكائنات و بعدين القضاء عليهم

و بجد الإنسان اللي قادر يخلق في وسط حياته و روتينه و جمود يومه معاني جميلة زي ده يببقى يا بخته

على فكرة أنا أول مرة آجي هنا

بس أنا عاجبني الرسمة جدا و مش عارفة انت أخدت بالك قبل كده انك بتعرف ترسم كاريكاتير ولاّ ده معلومة قديمة؟؟؟

معجبة بامكانياتك في خلق عالم لذيذ حواليك

الخميس, ٠١ مارس, ٢٠٠٧  
Blogger Hannoda said...

على فكرة أنا قريت
هذا ما يحدث كل يوم من أيام البيات الشتوي

مش عارفة أقولك ايه؟؟

الكلام جامد جدا و حسسني بانك جواك ألم بجد


فعلا استمتعت بالكلام.. ما قصدش طبعا اني استمتعت بالألم

بس أكيد فيه شيء كبير من الاستمتاع لما تحس انك نجحت في انك توصل اللي جواك

تحياتي واحترامي الشديد

الخميس, ٠١ مارس, ٢٠٠٧  
Blogger FATMA said...

حلوة أوي الصورة و مجنونة

الخميس, ٠١ مارس, ٢٠٠٧  
Blogger كلبوزة لكن سمباتيك said...

مساء الخير يا دكتور
تعالى لما احللك
صاحبك اللي راسمه ليه لابس نظارة سودا؟
هيا ناقصة؟
و ليه مناخيره بالذات كبيرة؟
عايز تبقى احلى منه
و اشمعنى طويل؟
بيكمل حاجة عندك؟
و نيجي للفراشة
انت ليه طيرتها؟
حاسس انك محبووس في الصيدلية و نفسك تطير زيها؟ علشان كده محبتش تتحبس حبستك؟
الف مبروك نتيجة التحليل طلعت
تعالى خد الاشعة
ايدك معايا

الجمعة, ٠٢ مارس, ٢٠٠٧  
Blogger bluestone said...

لذة الصيد .. وتعاطف الصياد
ايهما يغلب على الاخر
هو ما يحدد مؤشر إنسانيتنا في رأيي

برافو

تحياتي

الجمعة, ٠٢ مارس, ٢٠٠٧  
Blogger شــــمـس الديـن said...

السلام عليكم و رحمة الله و بركاتة
لذة الصيد دي بديهية من بديهيات الانسان ...

عامة مرحبا بك زميل المهنة :)

بدعوك اخي الفاضل انك تزور مدونة قاسم افندي ... و التفاعل و المشاركة http://kassemafandi.blogspot.com/

الجمعة, ٠٢ مارس, ٢٠٠٧  
Blogger shababik said...

ههههههههه
لذيذة اوى إنت رايق اوي
بس إنت كدة عامل شوية إعلانات تودي ف داهية يا دكتور!!!!!1و

الجمعة, ٠٢ مارس, ٢٠٠٧  
Blogger admelmasry said...

علي فكرة انا قريتها لما كانت التعليقات زيرو بس النت اللي كان معلق ومش عارف اكتب كومنت


طبعا انا مش عارف اقولك ايه


انت كتلة احساس وبس

الأحد, ٠٤ مارس, ٢٠٠٧  
Blogger عين ضيقة said...

الصيد ده لذته _ فى رأيى_ رغبة حيوانية

احساسك بالندم دلوقتى بيقول انك أصبحت إنسانا
بحق

بس الفراشة دى حلوة فعلا

تحياتى

الأحد, ٠٤ مارس, ٢٠٠٧  
Anonymous غير معرف said...

روح نام شويه
وبعد ما تستريح
رد على أسئله الدكتورة سمباتيك
;)

الاثنين, ٠٥ مارس, ٢٠٠٧  
Blogger Anima said...

أنا كمان عجبني قوي الراجل اللي إنت رسمته

بس مسكينة الفراشة

الاثنين, ٠٥ مارس, ٢٠٠٧  
Anonymous غير معرف said...

المشكله دي مشكلة فراغ
اكيد الصيدليه نايميه و معندكش ذباين

http://1minelnas.blogspot.com

الاثنين, ٠٥ مارس, ٢٠٠٧  
Blogger sydalany-وش مكرمش said...

nahrelhob
و شكرا ليكي
سبب عدم التعليق إني كنت حظلم اللي إنت كاتباه و حقطعه لإن مودي كان وحش

إبراهيم
حبقى أفرده عند المكوجي


هنودة:
شكرا جدا


توتة توتة
مجنونة مجنونة مش مشكلة

الثلاثاء, ٠٦ مارس, ٢٠٠٧  
Blogger sydalany-وش مكرمش said...

مساء الفل

صاحبك اللي راسمه ليه لابس نظارة سودا؟
هيا ناقصة؟
آه ناقصة و السبب الأهم إني كسلت أرسم عنيه فقلت أعلمه نضارة سودة مسحوبة يبقى كوووول لكن جيت أكحلها ..عميته

و ليه مناخيره بالذات كبيرة؟
عايز تبقى احلى منه
أظن إنه أحلى مني...و مناخيره كبيرة لإنه ببساطة مناخيره مش صغيرة

و اشمعنى طويل؟
بيكمل حاجة عندك؟
غريب السؤال ده من واحدة و أغلب البنات ما بيوصلوش لكتفي
كان يبقى أفضل لو كنتي سألتي ليه هو رفيع لإن حيبقى فيه تناقض واضح يبنى عليه إستنتاج تحليلي متزن
حلوة تحليلي متزن دي؟؟!!

و نيجي للفراشة
انت ليه طيرتها؟
حاسس انك محبووس في الصيدلية و نفسك تطير زيها؟ علشان كده محبتش تتحبس حبستك؟
لأ حسيت إني حبقى تافه جدا لو خدتها معايا البيت و شلت هم إني ما أقفلش عليها إخرام الهوا اللي عملتها ف علبة الزانتاك و كل ده عشان مجرد آخدلها صورة
بنفس الفكرة إن واحد يخطفك من الشارع و إنتي مروحة عشان تكتشفي بعد كده إنه شافك حلوة أوي لدرجة إنه حب يفرج أصحابه عليكي فخدك معاه و بعدها سابك تمشي ..و ف حالة الفراشة ..رماكي من البلكونة


الف مبروك نتيجة التحليل طلعت
الله يبارك فيكي يا أختي....و حيبقى ولد ولا بنت

تعالى خد الاشعة
منين
و سؤال ...هو إنت مروجة إشاعات

ايدك معايا
إزاي و أنا شايفها قدامي دلوقتي!!!!!!!!!

الثلاثاء, ٠٦ مارس, ٢٠٠٧  
Blogger sydalany-وش مكرمش said...

bluestone said...
شكرا

شمس الدين
هو الأخ صيدلي؟

شبابيك
تكرم خيي

آدم
المهم الكتلة
و أنا أحب اقولك إني زدت عن آخر مرة شفتني

عين ضيقة
أمال لو شفتها بعينك ...كان نفسي يبقى معايا الكاميرا الديجيتال

نبيذ
ما باحبش الخمرا
و شكلك ما قرتيش الموضوع كويس

واحد من الناس
حتى لما يبقى فيه زباين
تقدر تتأكد لو قريت البوست اللي فات

الثلاثاء, ٠٦ مارس, ٢٠٠٧  
Blogger أُكتب بالرصاص said...

وشك مكرمش
يا اخي اللي يعيش ياما يشوف
واللي يلف في الانترنت ياما يصطدم بمدونات
ومن حسن حظي اني اصطدمت بمدونتك الرائعة

بجد
مالكش حل




والا ليك ؟

الثلاثاء, ٠٦ مارس, ٢٠٠٧  
Anonymous غير معرف said...

وايه علاقة الخمرا بالموضوع
شكلك انت اللى ماقريتش تعليقى كويس
هه ;)

الثلاثاء, ٠٦ مارس, ٢٠٠٧  
Anonymous غير معرف said...

حببت الصورة كثيرا

الأربعاء, ٠٧ مارس, ٢٠٠٧  
Blogger Eman M said...

دى صغيرةو غلبانة :)

الأحد, ١١ مارس, ٢٠٠٧  
Blogger كلبوزة لكن سمباتيك said...

ايون
بروج اوشاعات سبت و تلات بس
انت اخبارك اية؟ و اخبار الصويدلية اية؟
و اية اخبار اخر الحشرات اللي دخلتلك
اطلع بدوا بقى للجيوب الانفية لحسن مهنجة معايا خالص
يبقى كومنت مدفوع الاجر
:)

السبت, ٢٤ مارس, ٢٠٠٧  

إرسال تعليق

<< Home

جميع حقوق النقل و الطبع محفوظة لصاحب المدونة©