الخميس، مارس 08، 2007

في نمرة مزولاني



علاقتي بالموبايل عملية جدا

مافيش حاجة عندي إسمها ميسد كول ....يا إما أتصل عشان أتصل أو أتفق مع إصحابي إن لما أرنلك تكنسل عليا

أطول مكالمة عملتها في الموبايل كانت عشان أسأل طبيب عن دواء كتبوا بخط وحش و ما كتبش الجرعة و المكالمة دي خدت حوالي ست دقايق لإنه جاله تليفون و إداني ساعتها عنوان العيادة عشان لو حد محتاج طبيب أطفال

أكتر إستخدامي للموبايل بيبقى عشان الكاميرا أما الإم بي ثري بلاير نادر لما أشغله ...و حتى الألعاب شلتها


و كعادتي لما نمرة غريبة ترنلي بشوف مين ...خاصة لما تكون رنت أكتر من مرة...فباتصل على طول عشان لو لاقدر الله زبون للصيدلية إديته نمرتي جراله حاجة

و هكذا
رنة
إتصلت
صوت واحدة سألتني عن رضا و قلتلها النمرة غلط و قفلت
فضلت كل ساعة تديني رنة خلال الأربعة عشرين ساعة اللي فاتت
إتصلت بيها
-إنتي عاوزة إيه بالظبط؟؟؟؟
-مش عاوزة حاجة
و قفلت
و رنت بعد ربع ساعة
لمدة إتناشر ساعة إتناشر رنة يهودي إصطدتها في رنتين منهم
إتصلت بيها تاني
-لو سمحتى ما ترنيش على النمرة دي تاني
-لأ
-طب إنتي عاوزة إيه؟؟
-أنا بس بحب أزاول الناس
صوت ضحك في الخلفية
...يبقى الزوق ما ينفعش...
-طب لو عوزاني أني** قولي!!!!
-أنا كنت فكراك محترم
قفلت
أنا قلت الحمد لله مش حترن تاني
دلوقتي لغاية لحظة كتابة البوست رنتلي 3 مرات مرة منهم إصطدتها و لبستها مكالمة

ملحوظة
أكتر حاجة مضايقاني في الموضوع إني طولت لساني ..لدرجة إني فكرت أتصل أعتذر عن الكلمة اللي قولتها لكن تراجعت ف آخر لحظة لما رنتلي تاني لإني عرفت ساعتها إنها تستاهل أسوأ من كده
رجاءا لو حد له في مزاولات التليفونات و الكلام الفاضي ده يتصرف معاها عشان ماليش في لعب العيال
النمرة:
تم حذف النمرة لإنها و الحمد لله من تاني يوم حطيت نمرتها على البلوج بطلت ترن
شكل حد عمل الواجب
و الأجر و الثواب عند الله

18 Comments:

Blogger free soul said...

almost the same that happened with me few days ago but a friend of mine dealt with the problem very well

a girl called insisting that i am same7 !! same7 meen i don't know, i tried to tell her that i am not same7 for no use for about 3 calls when i lost hope a friend volunteered and talked to her from my mobile as same7, love words and this nonsense "we koloo 3ala 7esabha mahy heya elly metesla aslan :D" and finally he gave her a date and never went :)

الخميس, 08 مارس, 2007  
Blogger Hannoda said...

فيه ناس كده ... فاضيين و معاندهمش دم ولا كرامة..
ولو أنا ليّ عتاب صغير عليك.. طبعا اذا سمحتلي

هي تستاهل .. بس ...

عموما ربنا يعينك على الرزالة وبعتذر

تحياتي

الخميس, 08 مارس, 2007  
Blogger عين ضيقة said...

يخرب عقلك
رقمها ده ضربة بجد
هتعرف دلوقتى هى يعنى ايه اشتغالات بجد

ربنا معاك ياخويا ويصبرك على بلواك

سلام

الخميس, 08 مارس, 2007  
Blogger sydalany-وش مكرمش said...

free soul
but the main problem that made me mad is giving me missed calls and not calling

hannoda
عاتبي براحتك
قصدك إيه؟
إنتي بتعتذري على إيه ...إنتي قلتي حاجة!!

عين ضيقة
أنا كنت ناوي ما أنزلش رقمها بس هي اللي رنت تاني ...هي اللي جابته لنفسها

الجمعة, 09 مارس, 2007  
Blogger sydalany-وش مكرمش said...

ملحوظة:
عين ضيقة

هو مش محتاج دعوات
مخروب لوحده

الجمعة, 09 مارس, 2007  
Blogger Lion king™ said...

هاهاها فكرتني بموقف حصلي
بس الغريبه بقى انها رنتلي
وقفلت كذا مرة
رحت متصل بيها مين حضرتك
قالتلي انت الي طالب
قلتلها انت لسا رنا حالا
قالت محصلش
قلت معلش يمكن انا الي غلطان
تاني يوم لقيتها بترن برضوا
روحت مكلمها وقلتها اعتقد انت لسا رنه حالا ياريت تحترمي نفسك لحسن ههزققك
يا تقولي انت مين
واكيد دعيت ربنا يهديها
وبعد كام يوم سكتت لوحدها
:)

الجمعة, 09 مارس, 2007  
Blogger sydalany-وش مكرمش said...

سبحان الله
تصدق يا ليون من ساعة ما حطيت نمرتها على النت بطلت ترن

شكل في حد عمل الواجب معاها

على العموم شكرا للي عمل حاجة

و الحمد لله إنها بطلت ترن عشان أنا كان ممكن آجي سكة

السبت, 10 مارس, 2007  
Blogger مصر هى أمى said...

وش مكرمش
بجد طحن جدا حكاية انك تحط نمرتها على المدونة بس للاسف انا جيت بعد ما انت شلت النمرة كنت عايز اظبطهالك جامد اوى بس ما علينا الشكل فى ناس قامت بالواجب

الأحد, 11 مارس, 2007  
Blogger كراكيب عادل said...

طول عمري اقول ان اكيد للمدونات فايدة

بس انا بحب في الحجات دي طولة البال

والرد بهدوء

علشان حرق الاعصاب

فية عندي تمرين حلو يهدي الاعصاب تعالي شوفة

الأحد, 11 مارس, 2007  
Blogger حائر في دنيا الله said...

شوف يعم محمود
دي من أساليب الحرب النفسية التي تمارس علينا
عشان بس تعرف
الناس دي مش هتسيبنا في حالنا
إلا ما نولع في نفسنا ونحضنهم
هههه
:)

سلام

الأحد, 11 مارس, 2007  
Blogger sydalany-وش مكرمش said...

محمد عادل
شايلينك لحاجة أكبر
على العموم الصيف قرب و اللي حيجرالي في الصيدلية قدام الفندق مش حيبقى شوية


كراكيب عادل
يا عم فكك
المهم أنا شفت مدونتك
حلوة


حائر
و تفتكر لو ولعت ف نفسك أو حضنتهم حيسيبوك
و تفتكر أيهم أسهل إنك تولع في نفسك و لا تحضنهم...و لع في نفسك أحسن عشان السجن صعب على أمثالنا

الأحد, 11 مارس, 2007  
Blogger Eman M said...

ما شاء الله ما شاء الله
الواحد مش عارف يقول إيه

الأحد, 11 مارس, 2007  
Blogger nahrelhob said...

انت في نمره مزولاك تخيل الصدفه انا كمان فيه ايميل مزاولني مش عارفه مين و كمان كاتبلي نمرة موبايله دبرني يا وزيييير

الاثنين, 12 مارس, 2007  
Blogger sydalany-وش مكرمش said...

إيمان
ما تقوليش حاجة
ولا أقولك
قولي سبحان الله و بحمده
سبحان الله العظيم
الحمد لله
و إنا لله و إنا إليه راجعون



نهر الحب:
إديني الإيميل ده أو حطي النمرة على البلوج عندك زي ما أنا عملت

و الراجل لا يلام ...شايف قدامه نهر حب و أغلبنا -كل البشر و ليس الرجل فقط- عطشانين للحب

الاثنين, 12 مارس, 2007  
Blogger Eman M said...

ما شاء الله ما شاء الله على الأخلاق اللى وصلنالها

الاثنين, 12 مارس, 2007  
Blogger سكينة said...

أنا أول مرة اتعثر بهذه المدونة لكن واضح انها لن تكون الأخيرة.
ورغم أني غريبة والغريب لازم يكون أديب يعني مش اعلق من اول مرة ولكن معلش بقى المسامح كريم.
اولا استغربت جدا من حكاية المعكاسات التليفونية!!!هيا يا جماعة لسه شغالة في عصر الانفلات ده والحريات الللا محدودة؟؟بجد مندهشة!!
احتمال البت طاقة يعيني من الزهق وبتفكر في اي حاجة جنان تخرجها من الكآبة وما تكونش وحشة بجد لكن انت تعبان وحساس.
:)

الخميس, 15 مارس, 2007  
Blogger david santos said...

هذا عمل جيد جدا ، شكرا

الخميس, 15 مارس, 2007  
Blogger sydalany-وش مكرمش said...

سكينة
أتعثر!!!!!!
محسساني إنها طوبة مش مدونة

davis
العفو

السبت, 17 مارس, 2007  

إرسال تعليق

<< Home

جميع حقوق النقل و الطبع محفوظة لصاحب المدونة©