السبت، مارس 17، 2007

شيكولاتة 1- حكايتي مع الشيكولاتة



قاعدة عامة في المجتمع المصري


ترقية فلان = علبة شيكولاتة

فلان رجع من الحج=علبة شيكولاتة

فلان نجح=علبة شيكولاتة

فلان دخل المستشفي يعمل عملية = علب شيكولاتة كتير

فلانة وقعت و رجلها إتكسرت و عملت عملية بمسامير و شرايح و قعدت في الجبس سنتين= علب كتيييييييير أوي من الشيكولاتة + أعداد ضخمة من العصائر

ده غير إن فلان ممكن يخطب و بعدها يكتب كتابه و بعدها يتجوز و يستقبل الناس


و لو الأحداث متتابعة فستتوفر كمية ضخمة من البنية اللذيذة

و في المجتمع المصري الشيكولاتة لا تفنى و لا تستحدث من العدم

و قد تجد علبة شيكولاتة جوالة تأخذ الرحلة كاملة من المصنع لمكان البيع->ليد الضيف ->لضلفة المكتبة ->لفوق الدولاب->ثم يعاد تغليفها لتخرج كزيارة لبيت ثاني->ثم تعيد دورة الحياة السابقة و تذهب لبيت ثالث و رابع و قد تدور على عائلة كاملة في أغلفة مختلفة و قد ينتهي بالعلبة المطاف لمصنع الشيكولاتة ليعاد تصنيعها أو تنسى على رف في أحد البيوت فتتلف ...و لو كان حظها جيد فستوضع فيما يدعى بونبونيرة و تقدم لبطون الضيوف


و طبعا العبد لله لم يرض هذا المصير المشئوم لعلب الشيكولاتة

فما كان يوضع فيما يدعونه البونبونيرة لا يمر عليه وقت إلا و يفنى

أما عن المخزون في المكتبة فكانت لي طرق سحرية فلا توجد علبة تبقى على حالها ....و كم من علبة جاء وقت خروجها من بيتنا فوجدوها قد خلت رغم أن الأغلفة الملونة سليمة و السيلوتيب سليم ...و السلوتب على العلبة بالداخل لم يلمس و الشريط الملون الملفوف حول كل هذا لم تفض أختامه

كانوا في بادئ الأمر يضحكون

ثم تحول الضحك لجلسات تعذيب و حرب نفسية بالكلمات المؤلمة...و هي حقا عذاب لا يحتمله طفل مرهف الحس و تنتهي تلك الجلسات في العادة بدموع و في المعتاد كانت أكثر الجمل قسوة و تعذيب

"هو أحنا حرمناك من حاجة...انت قلت عاوز و قلنا لأ...مش عيب تعمل كده"

و كالعادة بعدما ينسى الحدث ...ترجع ريما لعادتها القديمة

و كانت لي قدرة غريبة على إكتشاف الأماكن الجديدة لإختباء الأشياء و كلمتي المشهورة "فص ملح و داب ...نط فوق الدولاب" و التي كنت أقولها كلما أردت أن أوضح براعتي في إيجاد مخابئ الحلوى و خاصة الشيكولاتة و كانت لي براعة لاعب سيرك في التسلق للأماكن المرتفعة ...رغم أني لم أرى لي صورة من يوم ولدت و للآن لا أبدو فيها مكورا...و إن كنت الآن أبدو بعض الشئ ضخما و ليس ضخامة ضلفة دولاب بل أعني الدولاب نفسه

المهم ...نعود للموضوع

كانت لي عقلية إجرامية فذة و كانت لي سرعة فائقة في

ا-إكتشاف المخبأ

ب- إنزال العلبة

ج- إخراج قطعة أو قطعتين منها بطرقي الخاصة...و لكل عقلية إجرامية أسرارها

د- إعادة كل شئ على إلي ما كان عليه ‘بتداءا من التغليف و إنتهاءا بوضع العلبة التي كانت عليه في المخبأ

حتى البونبونيرة مع إنها شفافة كانت تبدوا ممتلئة و هي خاوية لم يبقى فيها إلا بعض القطع للتمويه


و قد مرت معي الشيكولاتة بمراحل تلخص تاريخي مع الشيكولاتة و أنواعها

و ده

موضوع تاني

...

16 Comments:

Blogger سكينة said...

حب الشكولاته واحد من دلائل السواء النفسي والناس اللي مش بتحبها أنا برضو مش بحبها
:)
عيب الشكولاته الوحيد سمعتها الوحشة وتحديها الدائم لإرادتي
:)
طبعا هي المنتصرة غالبا
:)
أتعثر من عثر يعني وجد أمر ما صدفة كما يحدث معك وعلب الشكولاته
مممم المدونة أرق من أن أصفها بطوبة
كان ممكن أقول صدفة لكن المسائل كانت طالبة معايا فصحى وقتها

السبت, 17 مارس, 2007  
Blogger ert3ashat said...

ahhahahhahaaa begd mwade3ak 3latoool gameeela....:)....mashaa alah goo onn....m3lesh makntsh bb3t mn 2bl kda we ana mdwen 7ades fa ya rab t2blony m3ako :)

السبت, 17 مارس, 2007  
Blogger ert3ashat said...

أزال المؤلف هذا التعليق.

السبت, 17 مارس, 2007  
Blogger ert3ashat said...

أزال المؤلف هذا التعليق.

السبت, 17 مارس, 2007  
Blogger توتة توتة said...

نفسي الاقي حد مش بيحبها

السبت, 17 مارس, 2007  
Blogger عين ضيقة said...

ههههههههههههه

انا كنت بعمل كده برضو

ع العموم اى مناسبة عندك ياعم , اعزمنا بس واحنا نهريك شيكولاتة

سلام يا باشا

السبت, 17 مارس, 2007  
Blogger sendrlla said...

على فكره انا برده بمووووووووووووووت فى الشيكولاته ودايما اول لماما لما اتجوز هفرض على العريس يفتحلى مصنع شيكولاته او سويت ماركت
هههههههههههههههههههههههههههههههه

الأحد, 18 مارس, 2007  
Blogger ادم المصري said...

دائما مبدع

حتي مع الشيكولاته

فانت ساحر

الأحد, 18 مارس, 2007  
Blogger أُكتب بالرصاص said...

الموضوع ده إجررررررام

اولا لان
الشيكولاته هي الشيء
مش الوحيد
اللي دايما نتخانق انا واولادي عليه
:)
ونخطفه من بعض وفضائيح
ثانيا
لان موضوع تداول السلطة
(اعوذ بالله)
تداول الهدايا
والواحد لما يجي له هديه يخبيها لظروف تانية ويروح يهادي بها

حصلت معايا
لدرجة اني رحت اديت هدية لواحد طق فناجين في ميلاد ابنه
وبعد ما رجعت البيت عصرت مخي
واكتشفت انه هو هو نفس الشخص اللي جاب لي الطقم ده من سنة في عيد جوازي

يادي الفضيحي
وكانت لسه بلفتها
يعني هو اللي لاففها بأيده
:)

الاثنين, 19 مارس, 2007  
Blogger ام العيال said...

شوكولاته
دي احلا حاجه
بيضا سوادا بني
حتى لو زرقا حكولها
انا و انا ضغيره لما حد كان يجبلنا علبه شوكولاته كنت الم عليها العيال صاحبي في العماره و اعمل مظاهره و نقعد ناكل فيها
مفيش علبه سلمت مني
:)

الثلاثاء, 20 مارس, 2007  
Blogger Hannoda said...

بتحاول تقنعنا انها أيام الطفولة و عدّت... بس معلش بقى .. واضح قوي ان الحركات التتحفة مستمرة معاك لحد دلوقت.. ولو ماكانتش الحكاية بالاستمتاع و التشويق الكبير ده

"فص ملح و داب ...نط فوق الدولاب"
الجملة ده مشكلة :)))

متخيلة مراتك دلوقت و صعبانة عليّ

طيب همّ خبوه الشيكولاتة فوق الدولاب

هي بقى حاتخبيها فين؟؟؟؟

:)))

الأربعاء, 21 مارس, 2007  
Blogger Hannoda said...

بتحاول تقنعنا انها أيام الطفولة و عدّت... بس معلش بقى .. واضح قوي ان الحركات التتحفة مستمرة معاك لحد دلوقت.. ولو ماكانتش الحكاية بالاستمتاع و التشويق الكبير ده

"فص ملح و داب ...نط فوق الدولاب"
الجملة ده مشكلة :)))

متخيلة مراتك دلوقت و صعبانة عليّ

طيب همّ خبوه الشيكولاتة فوق الدولاب

هي بقى حاتخبيها فين؟؟؟؟

:)))

الأربعاء, 21 مارس, 2007  
Blogger حائر في دنيا الله said...

بيني وبن الشيكولاتة علاقة غريبةن اغرب من اللي بتتكلم عليه
والمفروض ونتا بتجيت السيرة دي توزع على كل واحدة حتت شيكولاتة من النوع الهولندي المفتخر أو نوجا
عموما
اليوم الل بيعيدي من غير شيكولاته بيبقى يوم ناقص ساعات ودقايق

مع تحياتي

الخميس, 22 مارس, 2007  
Blogger bastokka طهقانة said...

طيب و اللي يسيب كومنت؟؟؟؟مش برضه ياخد شكاليتة؟

الخميس, 22 مارس, 2007  
Anonymous واحد من الناس said...

نفس الكلام ده بيتكرر مع المشروبات الغازيه و خصوصا في حالات المرض
مره كان عندنا حاله مرضيه بس طولت شويه لدرجة ان الناس كانت بتيجي اكتر من مره و في كل مره يجبو معاهم زجاجتين من المياه الغازيه
لدرجة انه اصبح عندنا ما يزيد عن تلاتين زجاجه
تخيل

الجمعة, 23 مارس, 2007  
Blogger sydalany-وش مكرمش said...

سكينة:
طب صدفة حلوة ولا وحشة


ارتعاشات:
قابلينك يا عم بس بعد كده يا تكتب بالعربي يا بالإنجليزي مش عربي بحروف إنجليزي
بتضطرني أقراها حرف حرف و بحس إني متخلف عقليا

توتة توتة:
مش حتلاقي
بس فيه ما بيحبوش الحلو بصفة عامة ...أدام الله عليهم حبهم للمر

عين ضيقة:
بس تبقى تجيبها من سويزا ما تسترخصش

سندريلا:
يبقى إدعي إنك ما تتجوزيش واحد زيي لإن مافيش حد فيكوا حيفرمل التاني و حتتحولوا بالونتين

آدم المصري:
ساحر!!
طب خد بالك لاحسن أسخطك


اكتب بالرصاص:
هههههههههههههه
طب خد بالك في المناسبة الجاية مش بعيد يجيبلك نفس الطقم و بهعدها تبقى وراثة و أحفادكم يتداولوا الطقم هما كمان

أم العيال:
و الله انت كنت طيبة أوي
أنا كنت باكولها لوحدي

هنودا:
لأ طبعا ما عدتش و ده ححكيه بالتفصيل في مواضيع جاية

و لو على مراتي فأنا مش متجوز فمش محتاجة تخبي حاجة


حائر:
لسة التقيل جي ورا

طهقانة:
المفروض اللي بيزور المدونة هو اللي ما يدخلش بإيده فاضية

واحد من الناس
آه ...القزايز الإتنين ليتر و خاصة فانتا و سبرايت ...لكن دلوقتي بقى كل الأنواع

الجمعة, 23 مارس, 2007  

إرسال تعليق

<< Home

جميع حقوق النقل و الطبع محفوظة لصاحب المدونة©