السبت، مايو ١٩، ٢٠٠٧

في شارعنا +النهاردة عدت عليا شحاتة

لو فاكرين المرحومة ...الكاميرا الديجيتال اللي ما أتهنتش بيها إسبوعين
جبت واحدة جديدة و قلت أجرب الزوم بتاعها
فتحت الشيش و جبت الزوم البصري و الديجيتال على الآخر و صورت و خلاص
فوجئت إن الصورة طلعت كده
الصورة دي من شارعنا
و جت صدفة
و مع إني باعدي رايح جي كل يوم
عمري ما حسيت إن شارعنا حي كده
شكرا للكاميرا الجديدة
..................................................................
النهاردة عدت عليا شحاتة
-عاوز فكة يا دكتور-
ماشي معاكي كام
و ف دماغي إنها حتقول عشرين و لا عشرة
لا قيتها بتقول خمسين
نحسبها كده
الشحاتة في 10 ساعات شغل أو أقل=50 فكة +المجمد اللي كان معاها بتاع خمسين جنيه كمان
و الصيدلي اللي قضى 19 سنة بين مراحل تعليم مختلفة من حضانة لجامعة
لما يقعد عشر ساعات في الصيدلية يصفي يومية =حوالي 20 جنية
مش بس كده
دي كانت عاوزة تنصب على الصيدلية ف جنيه
إدتني 49 بدل خمسين
لكن على مين
قعدت ربع ساعة أعد الفلوس
و بعد ما مشت
قعدت ربع ساعة أضحك و أتحسر على حالي

9 Comments:

Blogger سكينة said...

مبارك الكاميرا الجديدة ويا رب كل صورها تقدر تحسسك بنعمة الحياة وما تبصش في لقمة الشحاتة دي جابتها بقطع النفس والتظاهر بما ليس فيها من طيبة وانكسار يعني هيا كمان تعبانة يا عيني بس بطريقة مش أي حد يقدر عليها .. لو تحب جرب هتلاقي كل عك الصيدلة أسهل من كسرة النفس والذلية للي يسوى واللي ما يسواش
بكره ربك يعدلها إن شاء الله
وده مش تفاؤل ولا حاجة بس فنجان القهوة لسه سخن في ايدي

الاثنين, ٢١ مايو, ٢٠٠٧  
Blogger Halawa said...

حصلت معايا فبل كده بجد
بس في المواصلات
كانت بتعد غلة اليوم
وحبت الشحاتة تجمد الفكة

تحياتي :)

الأربعاء, ٢٣ مايو, ٢٠٠٧  
Blogger نبض اسكندرية said...

هههههههههههه

اخر زمن

على فكرة انا كنت هاموت واسع اغنية هام النام دى عشان عاوزة احفظها ومصدقتش نفسى لما دخلت ولقيتها عندك كنت هاموت من الفرحة

ميرسى ليك كتير

تحياتى

الجمعة, ٢٥ مايو, ٢٠٠٧  
Blogger Ahmed said...

ههههههههههههههه
صحيح اللي قال
هم يضحك
وهم يبكي
اه ومبروك الكاميرا

تحياتي

الاثنين, ٢٨ مايو, ٢٠٠٧  
Blogger واحد من الناس said...

مبروك عاكاميرا يا مان
ممكن اعرف نوعها ايه ؟؟

الثلاثاء, ٠٥ يونيو, ٢٠٠٧  
Blogger همس الليل said...

هههههههههههههههههههههههههههههه

الاغنيه دى مسخره اوى بحب اغنيها لنفسى لما اكون مليش نفس اكل او لما اكون باكل اكله حلوه

ابقى اعرفلى الشخاته دى بتقف فين عشان اقف جمبها يا عم والنبى

الثلاثاء, ١٢ يونيو, ٢٠٠٧  
Blogger  بسمه عبدالباسط said...

لا عادى هو ده حال بلدنا
ومبروك على الكاميرا
تحياتى

الثلاثاء, ١٢ يونيو, ٢٠٠٧  
Blogger *,*AMY LEE*.* said...

ههههههههههههههههههههههههههههه

عسلللل

ربنا يزيد ويبارك

الثلاثاء, ٠٤ سبتمبر, ٢٠٠٧  
Anonymous غير معرف said...

علي فكره بالنسبه للشحاته اللي بتفك منها دي شحاته مش مستوي علي فكره انا برده صيدلانيه والله ياسيدي رمضان اللي فات جات لي شحاته خليتني اتحسر علي نفسي عارف جايه تجمد مني كااااام تخيل تخيل الف ونص ايوه الف وخمسمايه لو ما فهمتش الاولانيه ده بس اول اسبوع وكل اسبوع اشي الف علي ستمايه علي خمسمايه خليتني افكر اسيب الصيدليه واروح اسرح معاها لما صاحبتي الطبيبه البشريه شافت كده قالت ملعون ابو الطب اللي اخر الشهر باخد250 جنيه
يا حسره علينااااااااااااااا احنا مالينا غير الشحاااااااااته علي فكره اول مره ادخل ومبسوطه اوي من كلااااااااامك

الأحد, ٠٩ سبتمبر, ٢٠٠٧  

إرسال تعليق

<< Home

جميع حقوق النقل و الطبع محفوظة لصاحب المدونة©