الاثنين، يوليو 25، 2005

إعلانات

موضوع في مدونة منت سخني إني إكتب
هي شرحت إعلانات بالتفصيل و الإعلانات اللي إتكلمت عنها أنا إفتكرتها علطول و أكيد فيه من اللي عدا عليهم الإعلان ولو مرة واحدة إفتكروه

الإستنتاج:
نوعية الإعلانات المضحكة أو اللي فيها ناحية قذرة بيثبت ف الذهن أكتر من أي إعلانات تانية

و حذكر أمثلة و مش حقول الإعلان كله
1-
"إيييزي موووووووزو"
2-
"رووحلها..رووحلها"
3-
"بيبو فرقع جيجي"
4-
"طلب رز ..عملت رز..طلب مكرونة ..برضه عملت مكرونة..بصلي من فوق لتحت وساب البيت
سمنك ف الأكل كتير..لأ
ولا قليل؟؟؟"
5-
"حندوس ف المنجة..آه يا منجة"
6-
"إديني شفطة...وحياة باباكي"
7-
"أنا معجب بيك أوي يا دكتور...أكيد مش أكتر مني يا دكتور.....هه حصل ..أكيد حصل"

بلاش دول خلينا ف إعلانات المواقف
إعلانات برفانات هوجو الحريمي
"do u always wait for him to make first move?"

إعلانات
axe
وحدث ولا حرج ....كلها

إعلانات الفيجرا
قمة ف القذارة
في المقابل إعلانات السيالس -و له نفس الإستخدام ما فيهوش- أي شئ يخدش الحياء

إعلانات الفوط الصحية
كلها بتخلي وشي يحمر
و كلها لازم الموديل تجري و تتنطط و توطي تلم عيال صغيرة أو كتب م الأرض
و ما بتوطيش زي أي بنت أهلها مربينها لأ لازم بطريقة تبين الفعالية

واحد شبه البرص الجعان
ياكل من المنتج يبقى روش طحن و البنات تتلم حوليه

أعلان مورو
كل شوية موتوسيكل أو عربية تقف و ينزل منها شباب مختلفي الأحجام من حجم البني آدم لحجم عجل صغير بيلعب حديد يعرضوا نفسهم على واحدة
و ف الآخر بتاع مورو هوه اللي يكسب


لكن ده ما يمنعش إن فيه إعلانات نضيفة و معلقة مع الواحد جدا و كتير عارفينها

مثال:
كنت ف رحلة فبدأنا نهيس كالعادة في رحلة الرجوع واحد بدأ أغنية إعلان و
كلنا غنينا معاه

"إديني لبانة من السحري ..إشمعنى السحري مصر عليه..جرب وحتعرف وحدك ليه ..السحري لبان أمضغوا ألقيه ألوان ألوان يا نهار أخبر..السحري البني و الأصفر تمضغ يديلك لون أحمر..لو عاوز أزرق أعمل إيه ..أُمضع ف الأول لون أحمر..دووق دووق دوق أحلى هدية السحري لبان طعموا يا جدعان ية المية ...أمضغوا و أنا أزود ف المصروف ..أبدا أبدا دا ما أهوش غالي و أشتري حتشوف
دووق دووق دووق أحلى هدية السحري لبان طعموا يا جدعان مية المية... دوق دوق
من هاني ويل

و فيه إعلان روعة
بتاع كادبوري
عندما تعشق الشيكولاتة
فعلا عبر عن إحساسي لما باكولها
الكرسي بيكبر بمعنى الراحة و الواحد يتحرك ف أثير من الحليب و الشيكولاتة


و فيه إعلان قديم أوي يدوب أوعى عليه
هاتلنا ريري هتانا ريري هتانا نه باكو و إتنين
إجري بسرعة يا واد يا حسين تقب و تغطس و تشوف فين شوفلينا ريري بيتباع فين..أنا جيت أهني بشكل جديد و معايا فيتامين كله حديد من رضعة واحدة إبنك حيزيد غير مشيه بدري ده بالتأكيد....
ريري جه هل هلاله الكل هيصله و قالوا ...جانا ريري جانا هيصوا و قولوا معانا..يا مشبعنا يا مغزينا يا مكبرنا و مقوينا ..هتلنا ريري هتلنا ريري هتلنا منه باكو و اتنين...البركة ف ريري"
والإعلان ده هو و بتاع اللبان كان لهم خلفية رسوم متحركة مش مودلس
وريري بعد ما الولد ياكل نلاقيه كسر الباب و طلع شايل أبوه ونسمع كلمة البركة ف ريري ...كان بيضحكني أوي الإعلان ده
على العموم اللي فاكر حاجة تانية يقولها
وحسيب فلسفةالموضوع لكم مش حفلسفه دلوقتي

الأحد، يوليو 24، 2005

ليه ما بيعشلكش حلم؟؟؟

و انت تسأل
ليه ما بيعشلكش حلم؟؟؟؟؟
هيّا هيّا
البداية اللي بتاخُدنا
تكسر الأحلام ف إيدنا
نبكي ..نصرخ
ييجي حد كبير ياخُدنا
نشتري ....حلمين جُداد
m.s

السبت، يوليو 23، 2005

تهييسة ما تاخدوش ف بالكم


إنتوا مين؟؟؟؟؟
مال شكلكوا غريب كده

الجمعة، يوليو 22، 2005

وش مكرمش

أول قصيدة سياسية أنشرها ف البلوجر فضلت إنها تكون وش مكرمش لإن البلوج ده متسمي بإسمها


وش مكرمش

ألف كتاب على وش مكرمش
يحكي تاريخ العالم كله
المتكَبَر والمتجَبَر واللي مكبَّر
واللي مطنش

احكيلنا يا خطوط الجبهة
عن أيام لصمود و دفاع
عن أيام الحنضل فاكهة
عنها الحسرة والأوجاع

وحنسمع لخطوط الخد
بتقول عن فرحة و كآبة
بتقول عن ضحكي و الجد
تفضح ف الناس الكدابة
تحكي ومش حتبقي لحد

ألف كتاب على وش مكرمش
يحكي تاريخ العالم كله
للي مكبَّر و اللي مطنش

كُلُه سكوت
امنع صوت
قول و اشجينا وبكي عنينا
دي الأدوار للناس بتهمش

صوت الوش ف آخر خط
خط الحرب
يحكي حكاية جدول ضرب
تضرب حبة .. واضرب حبة
سوا حنقسم
مين ف الناس يقدر يتكلم
طب والخلق الهايجة كتيرة
عملوا مسيرة ؟!!!!!!!!!
طب إسمَعها قصة قصيرة
جوه القصة
درس ومنُه راح تتعلم
"راعي اتاكل
مأمأ غنمُه
مين حيخاف؟!!!
مين حيخاف من كبش جبان و قرونُه اتاكلوا
يرجف لما الدنيا تضلم"
واللي بدأها
كلبُه بيسأل
طب و الأسود؟!!
لأ دا بتاعي
مين يتكلم
جوَا ف عينه ححُط صباعي
واهي دي حكاية
مالها نهاية
ليها بداية وكلُه عارفها

كله سكوت
امنع صوت
طب إحكيلنا يا عم الوش
عنه جنيهنا وليه حيروح
زي ما راح من قبله القرش

هم يضَّحَك
هم يبَّكي
فوق الوش
يابني دا إحنا
من أكبرنا لحد أصغرنا
جوا الكرش
إبلع .. أُهبُر
إهرَب بَرا
ألفاظ عامت فوق الوش
حتى ف جسم الناس ومرضهم
غش .. ف غش

من دلوقتي شوف ندابة
تييجي بسرعة علينا تصَوَت
أصل بلادنا حتبقى خرابة
واللي خربها حييجي يعيط

كله سكوت
امنع صوت
طب وسياسة عيش حتموت

يا بني ومالك
رَبي عيالك
سيبك من حالي
أو حالك
فكر ف اللي ف يوم يجرالك
أصل السايس
بالكرباج بيربي الخيل
حتة سُكر يمكن تبسط
بس نهار و ف آخرُه الليل

بس كفاية
رايح مركز للتجميل
رايح اشد خطوط الوش
يمكن أنسى كل حكاية
وانتَ كمان راح تيجي معايا
خط ف وشك لسه رفيع
إلحق شيلُه
قبل ما جوا ف قلبك يوجع
قبل ما تبقى وش مكرمش
شايل هم العالم كله
وكله .....مطنش .

تم كتابتها في
10-4-2003

الاثنين، يوليو 18، 2005

تحليل لواقعة الإمتحان

بما إن الواحد قادر يعمل من الحبة قبة -و هي مش حبة أبدا-قررت أعمل موضوع نناقش فيه المدرس نفسه و ده لا يمنع أبدا الرد على الموضوع اللي قبل ده من غير التطرق للمدرس
هي مشكلة المدرس ده الكبيرة مش إنه جه على أولى ثانوي لأنهم يعني م الآخر عالم مطرية و مريحة الجمجمة"أو كما تقال"فمش موضوع التعبير ولا موضوع الرسم اللي الواد من دول بيبقى داخله عشان يشبع غريزة إنتقامية بيرسم حاجات غريبة ما يرسمهاش عيل في حضانة اللي حيخليه يقول نعم لمبارك
المشكلة إن الشئ اللي حط الأمتحان تصور إنه كده حيخدم مبارك و إنه حيبقى ع الحجر" أو كما تقال"و أكيد طلع نقبه على شونة قليل إن ما
كانش أُعدِم بالخازوق
حتسألني ليه أقترحت إنه أعدم بالخازوق؟
أقولك .........تصور كده معايا عيل ما بيعرفش يرسم حاجة و مرة واحدة قالوله أرسم حمار ...............أو يعني حصان ................نفتكر يعرف ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
فما بالك لما ندي الواد العبيط ده موضوع و نقله إعمل شعار لتأييد الريس و الواد بعتهه- و غالبا ده اللي حصل-يقوم راسم صورة لفخامة الرئيس فنجد أنه نجح في رسم الح..صان و فشل كلياً في رسم بني آدم
لأ مش اللي ف بالك
أنا قصدي اللي حط الإمتحان

ياخي أ................؟

مش حبدأ بتعريف نفسي بمقال
مش ححط شعر
حبدأ بإمتحان
و الأمتحان ده حقيقي مش إفتكاسة
يا ريت تتعب عينك و تقراه
و مستني تعليقك

جميع حقوق النقل و الطبع محفوظة لصاحب المدونة©