الأربعاء، أغسطس 31، 2005

أنا لسة عايش

تصدقوا
فرحان أوي
إنشغلت حبة و والله مش بمزاجي
كان عندي ورشة شعر تبع إتحاد الكتاب ف القاهرة
و حصل شوية مواقف طريفة حبقى أحكيهالكو بالتفصيل
لكن للأسف أنا حتى ما كملتش الورشة و رجعت عشان مسافر بكرة سوريا
بغض النظر عن اللي بعدني عن البلوج و اللي حيبعدني تاني
حد حيسألني :فرحان ليه؟؟؟؟؟؟
ببساطة فرحان عشان في ناس إهتمت تسأل عن صيدلاني و ناس تانية سألت على وش مكرمش سواء على الإيميل أو على البورد بتاع الرسايل"على إيدك الشمال أول ما تخش البلوج"..واحد غلس حيسأل إيه لازمة الموضوع ده
ده ببساطة شكر لكل حد سأل و إعتذار للي دخل و ما لقاش موضوع جديد
و إكتشفت إني مدمن تدوين محتاج الجرعة
و............يااااه
لازم أروح دلوقتي أحضر الشنطة
وأنا خطفت الساعة دي
عشان أقولكوا
وحشتوووووووووووووووووووووووني
و حتوحشووووووووووووووووووووووووني
و حشني البلوج
و أهل البلوج

السبت، أغسطس 20، 2005

ناس كانت بتعرف تضحك

مين منكم ما سمعش عن أبو لمعة
أشهر فشار ف مصر
بصوا
أنا مش حتكلم ياما
إسمعوا دي
أبو لمعة مع الخواجة بيجو




save as

هم كانوا بيعرفوا يعملوا الضحك
و الناس كانت بتعرف تضحك
ملحوظة مهمة
الأوديو ده
rm

الاثنين، أغسطس 15، 2005

يا فتاح يا عليم




النهاردة نزلت ف مشوار أسود
إيه رأيكوا أحكيه إزاي
بطريقة صباح الفقر و لا ألف ليلة و ليلة ولا لمونة ف بلد قرفانة
خلينا بلسان ألف ليلة مع مسحة من صباح الفقر
بلغني أيها القارئ السعيد أنه في يومه و تاريخه أستيقظ وش مكرمش مغلق العينين مدلدل الأذنين مرهق كدابة "لادا" سارت على "التاني" لمدة أربع ساعات.........تحامل على نفسه و أرتدى القميص و البنطال الديرتي المزركش و نزل متعجلا
و ركب بربع دينار الدابة المتجهة ل"فيكتوريا"بتشديد الياء و كسر الراء علي وزن عموريا ..ألف ليلة بقى-و لما وصل وجد مالم يكن في الحسبان
...............................
زحام و بشرٌ أكوام ..فما كان منه إلا أن إنتظر ناقة توناية -و هي ناقة من الحجم الصغير تشبه المشروع وضيقة لأقصى حد
و لأنه عريض المنكبين
طويل القامة
ممتلئ
"من الآخر تقدر تقول تنين ..أو درفة دولاب..لأ دولاب كامل"
فلما سبق أن سردناه
ما كان منه إلا أن إنتظر توناية خالية كي يركب بجانب الحادي-السواق يعني-و مرت الدقائق كثيرة و نظر في الساعة الرملية فوجد أنه مر نصف مكيال من الرمل....إلي أن جاء الفرج
أو كذلك ظن
وقفت أمام العملاق ناقة توناية فانتهز الفرصة و قفز بجوار الحادي"السواق يعني حقولهالك كام مرة"و أنتظر الناقة "عبال ما تحمل"....و مرت دقائق أخري ..ربع مكيال من الرمل بالتمام و الكمال
فجأة
وجد الحادي-يوووه السواق السواق -ينظر إلى جانب الناقة الأيمن بتمعن و حسرة و أشار إليه بالنزول
وا أسفاه
كان "المساعد اليمين"بتاع الناقة مكسور
فسار العملاق حزينا
مكتئبا
كارها حياته و ضخامته
و في وسط اليأس
و الإكتئاب
و لعنه للحظ الهباب
و جاءه الفرج
وقفت أمامه دابة "من أم نص دينار" فركبها سعيدا فرحا كمن وجد سرة من الدنانير
و في الطريق رأى العجب العجاب
أقمشة معلقة منتشرة بشارع أبا قير كلها تبايع السلطان بولاية جديدة
و هذا كان نص بعضها
"العاملين بالعامرية للغزل و النسيج يبايعون الرئيس "
"عادل خلة يبايع الرئيس للمحافظة على الوحدة الوطنية"
و المفاجأة الكبرى
و لو مش مصدقني متعلقة نواحي نادي سموحة
"حضانة ترتلز و المسئولين عنها يبايعون الرئيس لولاية جديدة"
و أدرك الوش الصباح
و جاء مسرور من أمن الدولة حاملا "السيف أبو لمبة"فصرخت شهر زاد
مولاي
كوكو كوكو
علي يا علي
يا عترة يا فللي
و حياة سيدنا الولي فين إنت يا علي
..علي علي..علي يا علي
لا مؤاخذة
بس خلاص

الثلاثاء، أغسطس 09، 2005

مع نفسي

ما حستوش قبل كده برغبة ملحة في الكتابة ولما مسكتوا القلم -الكيبورد حاليا-ما عرفتش تكتب ولا كلمة

مش عارف أحيانا الكتابة بتبقى زي النجارة ..مسمارين من هنا على حبة غرا هنا و عاشق و معشوق كلام راكب على بعضه
و مش بعيد نلاقي فنان أويمة و هو الذي ينحت أشكال أو يعطي للخشي شكل ما مميز ..فنان الأويمة ده حيطلعلنا بحتة شغل-شعر ولا قصة- قمة في المنظر و لكن لو دعبست وراه حتلاقيه بيعيد نفسه
ملحوظة:من أشهر الصنايعية في العصر الحالي سيد حجاب..عبقري قادر يلعب بالمكعبات اللي معاه-مالهاش دعوة بمكعبات بنت مصرية-و يكون اللي هو عاوزه ببساطة و بلعبة الموسيقى اللي بتيجي من الكلام اللي شبه بعضه
مش عارف
طقت في دماغي فكرة هايلة إن أي كلمة تيجي في دماغي أكتبها
حبدأ من دلوقتي
3
2
1
إيه" مش عارف" دي كان إيه لازمتها..أمسحها ولا أسيبها ..لأ أسيبها مش خسران حاجة ..هبل ..جايز ..يااه عنيا مالها ..آآه الشاشة.. أغمق الإضاءة شوية..دي ع الآخر..حاول تركز ..قول حاجة حلوة..كده اللي حيقرا حينام منك..ما و أنت جي في الترام كانت الأفكار هايصة في دماغك ..حلو الشيبسي ده أوي..بالشطة و اللمون جبته من عند الكابتن و أنا جي..مش لا قي حاجة ..يمكن العيل الصغير اللي كان نفسك تلعب معاه اللي شفته في الترام يكون موضوع كويس..و لا البنوتة الصغيرة اللي ممكن تحلف بنية سليمة إنها أجمل من أجمل بنت من اللي بيلعبوا مع عينك لعبة اللي يعيش ياما يشوف ..و اللي يتجوز يشوف أكتر..بس ..ما تخشش في السكة دي ..حياخدوا عنك فكرة وحشة نقطتين يووه أنا كتبتها..مش المفروض..نسيت الشيبسي ..حلو جدا ..مش عارف الواد مستني عند بير مسعود و حبة و حيمشي ..أقابله؟؟..ما ينفعش الأحسن أنام عشان أروح بكرة الصيدلية ..مسلية أوي اللعبة دي..هههههه....ما تقلقش هم فاهمين إن الضحك ده ف سرك ما هو مش معقول واحد عاقل يضحك الضحكة اللي إنت ضحكتها دلوقتي جواك الساعةإتنين و ربع بالليل ..مش حتعرف تخلص الموضوع كده ..حتزهقهم ع الفاضي ..و خاصة إنك عاوز تخلص الشيبسي..إكتب إنه حجم عائلي..لو شافوك حيفهموا..و الكنبة بتندهلك..هايل أوي إحساس الأنتخة ..ممدد ع الكنبة ..المريحة جدا..و بتمد إيدك ف كيس الشيبسي و الخدر مخليك بترفعها بالعافية و بتفتح عينك بلطجة عشان تتفرج على التلفزيون ..روعة على رأي كارتون ديزني شانل ..مسلي الموضوع ..بس المفروض أقفله ..بس ده مش حيتقفل بطريقتك دي غير لما أنام و ده مستحيل..طب أكتب أول تني لسان ييجي على دماغك و بعدين كبر الخط و ظبط اللون..المروحة مالها بتتهز كده..من ساعة ما خبطتها و هي على الحال ده ..مش عارف أقفل الموضوع ..أكتبلهم إيه..أقولك
..بس خلاص

معلش يا جماعة طولت بس الواحد ما بعرفش يوقف دماغه
و أجمل حاجة في الموضوع إنك لو زهقت ممكن تفوتلك سطر ولا إتنين مش حتخسر حاجة
و في الختام
تاتا..على رأي ستيتش بتاع مسلسل ليلو أند ستيتش
ملحوظة:ستيتش مميز ..ميجا أكبر..ناجا ..أخ ..أوهانا
مش مهم تفهم ده كلام بلغة التجربة الجينية ستيتش و مش حتفهمه إلا لو كنت مدمن كرتون

الأربعاء، أغسطس 03، 2005

أفلام كرتون أكشن أول مرة


حالة غريبة معلقة معايا اليومين دول
حاسس إني عايش في فيلم كرتون
أيوة ما قريتش غلط ..فيلم كرتون
إيه عمرك ما حسيت الإحساس ده؟؟؟؟؟
لما كل شئ بيتحرك حوليك في إتجاه واحد و الشرير ليه ألوان حلوة و بيعمل حاجات تضحك
هو أنت ما شفتش خطاب الريس ولا إيه؟؟؟
بلاش خلينا ف توم أند جيري
االحكومة و المتظاهرين
جيري يروح يشد شعرة من شنب توم ف توم يتغاظ و يقوم يضرب فيه و ده بيخلي الشقة كلها ف حالة فوضى
تيجي الست السودة اللى معلماه الأدب متمثلة ف أمريكا و ف أيامنا دي كوندليزا
و تنده النداء الشهير و هي تقريبا الكلمة الوحيدة اللي كانت بتتقال في أفلام توم أند جيري "تووماااااااااس.......توومااااس"و تظهر ف الصورة رجلها و لابسة شراب ملون
و توماس الغلبان ينطرد بره البيت أو ياخد علقة بالمقشة على دماغه
و جيري متكئ و بيدندن ف قمة السعادة و هو قاعد سلطان زمانه ف المعتقل..قصدي في الجحر
بس ما أطولش عليكوا م الآخر شكلي عامل كده

............................................................................................................................

ملحوظة: ده الجزء الأول و البقية عن أفلام الكرتون الحياتية تأتي بإذن الله

و الصورتين من تصميمي الخاص

جميع حقوق النقل و الطبع محفوظة لصاحب المدونة©